کنداپور: کووِڈپوزیٹیو شخص نے کیاباتھ روم کااستعمال۔پٹرول بنک کردیا گیا سیل۔ کیا اڈپی آرینچ زون میں چلاجائے گا؟
کنداپور،28/اپریل (ایس اونیوز) منڈیا سے تعلق رکھنے والا ایک شخص جو مال بردار گاڑی کے ذریعے ممبئی سے سفر کر کے آیاتھا اس کی طی جانچ سے پتہ چلا ہے کہ وہ کووِڈ 19پوزیٹیو ہے۔
اسسٹنٹ سپرنٹنڈنٹ آف پولیس ہری رام نے بتایا کہ اس شخص نے سفر کے دوران کنداپور تعلقہ کے تیکٹّے میں واقع ایک پٹرول بنک کے باتھ روم میں غسل کیا تھا، جس کی وجہ سے اس پٹرول بنک کو سیل ڈاؤن کردیا گیا ہے۔اس کے علاوہ ٹول گیٹ کے 6اور پٹرول بنک کے مالک کے علاوہ عملہ کے 6اراکین کو کوارنٹاین کیا گیا ہے۔
بتایاجاتا ہے کہ ہوٹل میں ملازمت کرنے والا مذکورہ شخص 20اپریل کو غیر قانونی طورپر کھجوروں کے ٹرک میں سوا ر ہوکر ممبئی سے منڈیا پہنچا تھا۔ منڈیا میں 24اپریل کو اس کی جانچ پوزیٹیو نکلی۔ تفتیش کے دوران اس نے بتایا کہ سفر کرتے ہوئے اس نے شیرور اور ساستھان کے درمیان واقع ایک پٹرول بنک کے باتھ روم میں غسل کیا تھا۔
منڈیا کے ڈی سی کی طرف سے یہ جانکاری ملنے پر کنداپور تعلقہ ہیلتھ آفیسر ڈاکٹر ناگ بھوشن اور کوٹا پولیس سب انسپکٹرنتیا نند گوڈا نے اس علاقے میں واقع پٹرول بنکس کا جائزہ لیا اور سی سی ٹی وی کیمرے کے فوٹیج سے متعلقہ پٹرول بنک کی نشاندہی ہوگئی۔ذرائع سے ملی اطلاع کے مطابق کنداپور تعلقہ کےتراسی کے قریب تیکٹّے پٹرول پمپ پر اس کی گاڑی رُکی تھی اور اسی پٹرول پمپ کے باتھ روم میں اس نے غسل کیا تھا۔ معاملے کی تصدیق ہوتے ہی پٹرول پمپ مالک سمیت جملہ سات لوگوں کو کورنٹائن میں بھیجا گیا ہے۔اسی طرح ساستھان ٹول پلازہ میں اُس وقت موجود چھ لوگوں کو بھی کورنٹائن میں بھیجا گیا ہے۔
بعض ذرائع سے ملی اطلاع کے مطابق اب اس پٹرول بنک کے قریب 3کلو میٹر ایریا کو سیل ڈاؤن کرنے کی تجویز پرغور کیاجارہا ہے۔ضلع انتظامیہ کی طرف سے اس شخص کے خلاف قانونی کارروائی کرنے پر بھی غور ہورہا ہے۔
اس معاملے سے اڈپی ضلع کو گرین زون میں بنے رہنا مشکل ہوگیا ہے۔ خیال رہے کہ کچھ دن پہلے اڈپی کوگرین زون میں شامل کیا گیا تھا اور گزشتہ 28 دنوں سے کوئی نیا پوزیٹیو معاملہ سامنے نہ آنے سے امید تھی کہ اسے گرین زون میں ہی رکھا جائے گا، لیکن اس مسافر کی غیرذمہ دارانہ اور غیر قانونی حرکت کی وجہ سے شاید اڈپی ضلع کو اب آرینچ زون میں رکھے جانے کا خدشہ ہے۔