کنداپورمیں آئس کریم کھانے سے 30بچے بیمار؛ بڑی عمر کی خواتین بھی متاثر
کنداپور25؍مارچ (ایس او نیوز) یہاں پیش آئے ایک المناک واقعے میں بیلوے، ہینگاولی اور ٹومبیٹو نامی علاقے میں تقریباً 30بچے آدھی رات کو غذائی سمیت (ٖفوڈ پوئزننگ) کا شکار ہوگئے جس سے انہیں قئے شروع ہوگئی اور طبیعت بگڑنے لگی تو پہلے انہیں بیلوے کے سرکاری اسپتال میں داخل کیاگیا اور پھر صبح میں کئی بچوں کو نجی اسپتالوں میں بھی منتقل کیاگیا۔
بتایا جاتا ہے کہ ایک شخص اسکوٹر پر آئس کریم فروخت کرنے کے لئے مضافات میں گھوم رہاتھا۔ اتوار چھٹی کا دن ہونے کی وجہ سے بہت سارے والدین نے اپنے بچوں کو آئس کریم خرید کر کھلایا۔ مگر آدھی رات کو ان تمام بچوں کی طبیعت خراب ہوگئی جنہوں نے آئس کریم کھائی تھی۔ بتایاجاتا ہے کہ دو سال کی عمر سے لے کر ۱۲ سال کے بچوں کے علاوہ کچھ بڑی عمر کی خواتین بھی آئس کریم کی وجہ سے غذائی سمیت کا شکار ہوگئی ہیں ۔
کنداپور تعلقہ کے ہیلتھ آفیسر ڈاکٹر ناگ بھوشن نے اسپتال کا دورہ کیا ہے اور بچوں کی صحت کے تعلق سے معلومات اکٹھا کیں ہیں۔ اس کے علا وہ پولیس بھی اس معاملے کی تحقیقات میں جٹ گئی ہے۔