گنگولی،18؍ ستمبر (ایس او نیوز) گنگولی کے کھاروی کیری میں واقع  گنپتی مندر میں اپنے جسم پر پٹرول انڈیل کر خودسوزی کرنے والے راگھویندرا کھاروی (35سال)نے جو کہ %90 تک  جل گیا تھا زخموں کی تاب نہ لاتے ہوئے منی پال اسپتال میں دم توڑ دیا۔

جب تراگھویندرا نے پٹرول انڈیل کر اپنے آپ کو آگ لگالی تو مندر میں موجود بہت سے لوگوں نے اس کی جان بچانے کی کوشش کی تھی۔ ان میں  جناردھن کھاروی اور لکشمن کھاروی نامی دو افراد بھی شدید زخمی ہوگئے تھے۔وہ دونوں اب بھی منی پال میں زیر علاج ہیں۔

بتایا جاتا ہے کہ کچھ عرصے سے راگھویندرا کھاروی اپنے بدن میں ’ناگ دیوتا‘ داخل ہونے کا دعویٰ کرنے لگا تھا اور اس بات سے ناراض تھا کہ اسے کسی بھی مندر میں باضابطہ ’ناگا پاتری‘ کا منصب سنبھالنے کا موقع نہیں دیا جارہا ہے۔ مبینہ طور پر اسی حالت میں اس کا دماغی توازن بگڑ گیا اور اس نے مہالیا اماؤس کے موقع پر مندر کے اندر خودسوزی کی کوشش کی جوکہ بعد میں ہلاکت خیز ثابت ہوئی۔