کنداپور30/اکتوبر (ایس او نیوز) غیر قانونی طور پر داونگیرے سے کیرالہ کے منجیشورم میں واقع قصائی خانے کے لئے بھینسیں لے جانے کے الزام میں پولیس نے دو ملزمین کو گرفتار کرلیا اور 21مویشی ضبط کرلیے۔

گرفتار کیے گئے ملزمین کی شناخت داونگیرے کے رہنے والے عمران باشاہ (27سال) اور پرانی ہبلی کے رہنے والے تبریز بیپاری (22سال) کے طور پر کی گئی ہے۔ ذرائع کی مانیں تو اسسٹنٹ زونل فوریسٹ آفیسر دیانندا اور فوریسٹ گارڈ جناردھن پجاری جب رات کے وقت پٹرولنگ کر رہے تھے تو انہوں نے کولور میں نائیکوڈی چیک پوسٹ پر ایک ٹرک کو روکا۔ تلاشی پر اس کے اندر غیر قانونی اور غیر انسانی طرز پر 21جانور ٹھونسے ہوئے پائے گئے۔فوریسٹ افسران نے فوری طور پر اس کی خبر کولور پولیس کو دی تو پولیس افسران نے موقع پر پہنچ کا بھینسوں سے بھری ٹرک کو ضبط کرنے کے ساتھ دونوں ملزمین کو بھی گرفتار کرلیا۔

پولیس کا کہنا ہے کہ بچائے گئے مویشیوں میں 12بھینسے تھے اور 9بھینسیں تھیں، جن کی مجموعی مالیت کا اندازہ 5.5لاکھ روپے لگایا گیا ہے۔کولور پولیس اسٹیشن میں کیس درج کرلیا گیا ہے۔ بتایا گیا ہے کہ اس مہم میں بجرنگ دل کے اراکین نے بھی حصہ لیا تھا۔