کنداپور:ماں کے پہلو میں سوئی2سالہ بچی کو نامعلوم نقاب پوش اٹھا لے گئے
کنداپور11/جولائی (ایس او نیوز) کنداپور کے مضافات ایڈاموگے میں ایک سنسی خیز واردات پیش آئی جس میں ایک دو سالہ بچی کو دو نامعلوم افراد آدھی رات کے وقت گھرمیں گھس کر اٹھا لے گئے۔
موصولہ رپورٹ کے مطابق ایڈا موگے کنداپور کا ایک دوردراز مقام ہے جہاں سنتوش نائکا کا گھر واقع ہے۔ یہاں سنتوش کی ۲ سالہ بچی اپنی ماں کے پہلو میں سوئی تھی جب رات کے 4بجے گھر کے بائیں دروازے سے دو نامعلوم نقاب پوش اندر داخل ہوئے اور بچی کو اغوا کرلیا۔ گھر میں کسی قسم حرکت محسوس ہونے پر بچی کی ماں نیند سے بیدار ہوئی اور اغواکاروں پیچھے دوڑ پڑی۔ وہ اپنی بچی واپس دینے کی التجا کرتی رہی مگر اغواکاروں نے تیز رفتاری سے بھاگتے ہوئے قریب میں بہتی ہوئی ’کوبجا‘ ندی میں بچی کے ساتھ چھلانگ لگادی۔ اور تیرتے ہوئے ندی پار کرنے کے بعد ہوسانگڈی کی طرف بھاگ کھڑے ہوئے۔
اس واردات سے ایڈا موگے اور اطراف کے عوام میں سنسنی پھیل گئی ہے۔ سبرامنیا پولیس نے معاملہ درج کرنے کے بعدتحقیقات تیز کردی ہے۔