کنداپور میں لاپتہ بزرگ خاتون کی نعش بالاخر قریبی ندی سے برآمد؛ حادثاتی طور پر نالے میں گرکر بہہ جانے کا خدشہ
کنداپور9/ستمبر (ایس اونیوز) کنداپور تعلقہ کے ہیسکوٹور گاؤں میں کنکا کلاٹی (62سال) نامی ایک بزرگ خاتون 8ستمبر کی آدھی رات سے غائب ہوگئی تھیں جس کی نعش آج پیر کو برآمد کرلی گئی ہے۔ شبہ کیا جارہا ہے کہ شاید وہ گھر کے قریب بہنے والے نالے میں گر کر پاس میں ہی واقع ندی میں بہہ گئی ہوگی۔
بتایاجاتا ہے کہ کنکا کلاٹی آدھی رات کو رفع حاجت کے لئے گھر سے باہر نکلی تھی۔ پھر وہ لوٹ کر واپس نہیں آئی۔گھر والوں نے خدشہ جتایا ہے کہ چونکہ بجلی نہ ہونے کی وجہ سے باہر اندھیرا تھا اس لئے رفع حاجت کے لئے نکلنے والی کنکا گھر کے پاس سے بہنے والے نالے میں گر گئی ہوگی۔ یہ نالا پاس ہی بہنے والی ندی میں جا ملتا ہے۔ مسلسل بارش کی وجہ سے نالا بہت تیز رفتاری سے بہہ رہا تھا۔ اس طرح یہ بزرگ خاتون نالے سے گزرکر ندی میں غرقاب ہوگئی۔
واقعے کا علم ہوتے ہی آس پاس کے لوگوں نے گھر والوں کے ساتھ مل کر کنکا کو ہرجگہ تلاش کیامگر کہیں بھی اس کا پتہ نہیں چلا۔اس کے بعد ماہر غوطہ خوراور فائر بریگیڈ عملے نے بھی لاپتہ خاتون کو تلاش کرنے کی ہر ممکن کوشش کی، مگر نالے کے تیز بہاؤ کی وجہ سے کوئی مثبت نتیجہ نہیں نکلا۔ مگر آج پیر کو اس کی نعش ہیسکوٹور ندی سے برآمد کرلی گئی۔
ندی میں بہہ کر لاپتہ ہونے کی اطلاع ملتے ہی ڈسٹرکٹ سپرنٹنڈنٹ آف پولیس نیشا جیمز، کنداپور تحصیلدار ٹیپّے سوامی، کنداپور مضافاتی پولیس اسٹیشن ہاؤس آفیسر سریدھر نائیک، کو ٹا اسٹیشن ہاؤس آفیسر نتیا نندا گوڈا اور دیگر افسران نے متاثرہ خاندان کی رہائش گاہ پر پہنچ کر گھروالوں کو دلاسہ دیا تھا۔
کنڈلور پولس تھانہ میں معاملہ درج کیا گیا ہے، پولس مزید چھان بین کررہی ہے۔
