کنداپور اور بیندور پولیس نے دبئی سے سونا اسمگل کرنے کے الزام میں بھٹکل کے 13افراد کو کیا گرفتار
کنداپور27/فروری (ایس او نیوز) دبئی سے کالیکٹ ایئر پورٹ پر اترنے کے بعد غیر قانونی طور پر کار اور ٹرین کے ذریعے سونا اسمگل کرنے کے الزام میں کنداپور اور بیندور پولیس نے بھٹکل سے تعلق رکھنے والے 13افرد کو گرفتار کیا ہے اوران کے قبضے سے تقریباً51لاکھ روپے کا سونا ضبط کیا ہے۔
ذرائع سے ملی اطلاع کے مطابق گرفتار کیے گئے ملزمین کی شناخت نوید (23سال)، محمد خلیل(62سال)، محمد عاصم (23سال)، فیض احمد ماوان (29 سال)، محمد عدنان(25سال)، مجتبیٰ قاسم(25سال)، عمیر احمد (32سال)، واصف احمد (27سال)، مزمل (38سال)، جمیل (42سال) اور میر سمیر (34سال) کے طور پر کی گئی ہے جو مبینہ طور پر بھٹکل کے باشندے ہیں۔ یہ لوگ دبئی سے بدھ کے دن کالیکٹ ایئر پورٹ پر اترے تھے۔ پھرٹرین سے سفر کرتے ہوئے منگلورو سے11 افراد ٹویرا کاروں میں بھٹکل کی طرف روانہ ہوئے تھے۔ جبکہ دو افراد ٹرین سے سفر کررہے تھے۔
اڈپی پولیس کو ان لوگوں کے ذریعے غیر قانونی طور پر سونا اسمگل کرنے کی مصدقہ خبر ملی تھی، جس کی بنیاد پر اڈپی ضلع ایس پی وشنو وردھن اور ایڈیشنل ایس پی کمار چندرا کی رہنمائی میں کنداپور کے اسسٹنٹ ایس پی ہری رام شنکر اور دیگر پولیس افسران نے صبح 11بجے کنداپور میں KA05AD7524, KA05AD4970نمبر پلیٹ والی دو ٹویرا کاروں کو روک کر تلاشی لی۔ پولس ذرائع کے مطابق اس میں سے ایک کار میں سفر کررہے چھ مسافروں کے قبضے میں سے 1152.47 گرام سونے کے سکّے ضبط کیے گئے۔ جس کی مالیت کا اندازہ 46لاکھ روپے لگایا گیا ہے۔ جبکہ دونوں کاروں میں موجود مسافروں کو گرفتار کرنے کے علاوہ دونوں کاریں بھی ضبط کی گئی ہیں جن کی مالیت 10لاکھ روپے لگائی گئی ہے۔ ضبط شدہ سونا سمیت دونوں کاروں اور ملزمین کوبھی اگلی کارروائی کے لئے منگلورو کسٹمز کے حوالے کیا گیا ہے۔
دوسری طرف بیندور سرکل انسپکٹر نے ٹرین میں سفر کررہے مزید دو مسافروں کو بیندور ریلوے اسٹیشن پر گرفتار کرلیا ہے اور ان کے پاس موجود 231 گرام سونا ضبط کرلیاہے جس کی مالیت 9لاکھ روپے بتائی گئی ہے۔