کمٹہ 5 / مارچ (ایس او نیوز) یہ کوئی ڈھکی چھپی بات نہیں ہے کہ سیاست دان ہر کام میں اپنا مفاد پیش نظر رکھتے ہیں، لیکن اب تو صورت حال یہ ہوگئی ہے کہ اس بات کا کھلے عام اعتراف کرنے میں بھی انہیں شرم نہیں آ رہی ہے۔ اس کی تازہ ترین مثال ہوناور- کمٹہ کے ایم ایل اے دینکر شیٹی کا وہ بیان ہے جس میں انہوں نے ایک عام اجلاس میں کہا ہے کہ 25فیصد عوامی مفاد کے ترقیات کام الیکشن کے موقع پر انجام دینے کے لئے باقی رکھ چھوڑے ہیں۔

    ہوناور کے ۹ گرام پنچایتوں کے لئے شراوتی ندی سے پانی فراہم کرنے والے منصوبے کی شروعات کے سلسلے میں منعقدہ اجلاس سے خطاب کرتے ہوئے دینکر شیٹی نے کہا کہ میں نے صد فی صد ترقیاتی منصوبے ابھی مکمل نہیں کیے ہیں۔ سب کچھ ابھی پورا کردیا جائے گا تو پھر عوام الیکشن کے موقع پر میرا کام یاد نہیں رکھیں گے۔ اس لئے ابھی میں نے صرف 75 فی صد کام ہی پورے کیے ہیں ۔ بقیہ 25فی صد ترقیاتی کام الیکشن کا موسم قریب آنے پر شروع کیا جائے گا۔ 

    اس موقع پر شہری ترقیات کے وزیر بھئیرتی بسواراج اور ضلع انچارج وزیر شیورام ہیبار بھی اسٹیج پر موجود تھے۔ ظاہر ہے کہ رکن اسمبلی کا یہ مفاد پرستانہ اور غیر ذمہ دارانہ بیان ان کے لئے خفت کا باعث بن گیا ہوگا ، کیونکہ حالیہ بی جے پی حکومت سابق وزیر اعلیٰ سدارامیا پر الزام لگاتی رہی ہے کہ انہوں نے اسمبلی الیکشن سے قبل سیاسی فائدہ اٹھانے کی نیت سے بہت سارے ترقیاتی منصوبوں کا برائے نام سنگ بیناد رکھا تھا یا اعلان کردیا تھا جس کی تکمیل بعد میں بی جے پی کو کرنا پڑی ہے۔ اوراب خود بی جے پی کے وزراء اور اراکین اسمبلی یہی روش اختیار کریں گے تو بی جے پی پر سوال اٹھنا لازمی ہے۔     دینکر شیٹی کے اس بیان پر سوشیل میڈیا میں بہت ہی گرما گرم بحث چل پڑی ہے اور بڑے پیمانے پر اس کی مذمت کی جا رہی ہے۔