کمٹہ: کنڑا زبان کے مشہور شاعرڈاکٹربی اے سندی انتقال کرگئے
کمٹہ یکم اپریل (ایس او نیوز)مشہور قلمکار اور’ انسانیت کا شاعر‘ کے نام سے جانے والے کنڑا زبان کے مشہور و معروف شاعرجناب ڈاکٹر بابا صاحب احمد صاحب سندی 86سال کی عمر میں انتقال کرگئے۔
عام طور پر بی اے سندی کے نام سے معروف ڈاکٹر بابا صاحب ضلع شمالی کینرا سے کنڑا ادب کا ایک بہت ہی معتبر نام تھا۔ آپ نے ممبئی آکاش وانی مرکز کے علاوہ بیرون ریاست کے مختلف مقامات پر خدمات انجام دی تھیں۔ سندی صاحب کو ’پمپ ایوارڈ‘،’شریشٹ گڈی ناڈو کنڑیگا ایوارڈ‘ ’راجیہ اتسوا ایوارڈکے علاوہ کرناٹکا یونیورسٹی دھارواڑ سے اعزازی ڈاکٹریٹ کی ڈگری سے بھی نوازا گیا تھا۔سندی صاحب کمٹہ میں واقع اپنے سسرال میں ایک زمانے سے قیام پزیر تھے۔آپ بہت ہی ملنسار اور بڑے ہی خوش اخلاق انسان تھے۔
انہوں نے کمٹہ تعلقہ کے ہیروٹّا میں واقع اپنے ذاتی مکان میں زندگی کی آخری سانس لی۔ ان کی ایک بیٹی اور ایک بیٹے کے علاوہ چاہنے والوں اوردوست احباب کا ایک وسیع حلقہ ہے جو ان کی رحلت پر سوگوار ہوگیا ہے۔اللہ تعالیٰ مرحوم کی بال بال مغفرت فرمائے۔