کمٹہ:21؍ ستمبر(ایس اؤ نیوز)کمٹہ میں مجوزہ سوپر اسپیشالٹی اسپتال کی تعمیر کو لےکر ڈپٹی کمشنر اور نِٹَّے کے کے ایس ہیگڈے اسپتال کے افسران پر مشتمل ٹیم نے مختلف چار جگہوں کا معائنہ کیا۔

خصوصی ٹیم نے شہر کے ریلوے اسٹیشن کےقریب موجود 17ایکڑ روینیوڈپارٹمنٹ کی زمین، کونکن ایجوکیشن ٹرسٹ کےقریب والی زمین، تعلقہ کےمرجان میں قومی شاہراہ کے قریب والی فوریسٹ زمین اور شیلےدیہات میں کمٹہ ۔ سرسی سڑک کنارے موجود زمین کامعائنہ کیا۔ معائنے کے بعد ٹیم کی اسسٹنٹ کمشنر کے دفتر میں میٹنگ ہوئی جس میں نٹے کے کےایس ہیگڈے میڈیکل یونیورسٹی کے نائب ڈاکٹر جئےپرکاش شٹی نے بات کرتےہوئےکہاکہ 100بیڈ والے کمٹہ سرکاری اسپتال میں  300بیڈ کا اضافہ کیا جائے پھر اس  کے 5سال بعد 600بیڈ کئے جائیں اور اس طرح اسپتال کو مزید ترقی دے کر یہاں ٹیچنگ اسپتال کی سہولیات مہیا کرائی جاسکتی ہیں۔ اس کے بعد سوپر اسپیشالٹی اسپتال کی سہولیات کے ساتھ کے ایس ہیگڈے میڈیکل یونیورسٹی کی تعمیر کی جاسکتی ہے۔ انہوں نے کہا کہ کمٹہ میں صرف سوپر اسپیشالٹی اسپتال کی تعمیر کے امکانات ہیں اس سلسلےمیں ہمارے ادارے کے ذمہ داروں کےساتھ گفتگو کی جائے گی 

میٹنگ میں اس بات پر بھی غورکیاگیا کہ اگر کمٹہ میں سوپر اسپیشالٹی اسپتال کی تعمیر ہوگی تو ماہر ڈاکٹروں کی سہولیات فراہم کیسےکی جائے گی۔ اسپتال کے انجنئیر آنند، اے سی راگھویندر جگلاسر ، تعلقہ میڈیکل آفیسر ڈاکٹر آگنیا نایک، گریڈ-2تحصیلدار اشوک بھٹ وغیرہ بھی موجود تھے۔