بھٹکل میں شدت کی گرمی کے بعد اسمان ابر آلود؛ ہلکی بارش کے ساتھ بجلیوں کی چمک، کمٹہ کے گوکرن میں بجلی گرنے سے عورت ہلاک
بھٹکل31؍مئی(ایس اؤ نیوز) گذشتہ ایک ہفتہ سے جاری شدت کی گرمی سے آج اتوار کو عوام کو تھوڑی بہت راحت کی سانس لینے کا موقع ملا جب صبح کی اولین ساعتوں میں ہلکی بارش کے ساتھ بجلیاں گرنی شروع ہوگئیں۔ اُدھر پڑوسی تعلقوں کمٹہ اور انکولہ میں دیر رات سے ہی موسلادھار بارش ہونے کی اطلاعات موصول ہوئیں، مگر بھٹکل میں شدت کی گرمی میں مزید اضافہ دیکھا گیا۔
کمٹہ اور انکولہ میں بادلوں کی گرجدار آوازوں کے ساتھ گری بارش سے قریب ایک گھنٹہ تک الیکٹری سٹی بھی فیل رہی، مگر محکمہ ہیسکام کے اہلکاروں نے راتوں رات بجلی بحال کرنے سے بھٹکل کے عوام کو بھی راحت ملی۔ البتہ صبح ہوتے ہوتے بھٹکل میں بھی ہلکی بارش سے موسم تھوڑا تبدیل ہوتا ہوا نظر آیا۔ صبح سے شام تک ویسے بھٹکل میں اسمان ابرآلود رہا، مگر بارش کی بوند بھی گرتی نظر نہیں آئی۔ آثار دیکھنے سے لگ رہا ہے کہ رات کو اچھی بارش ہو سکتی ہے ، اگر ایسا ہوتا ہے تو پھر شہر میں گرمی کا زور ٹوٹ سکتا ہے، ورنہ شدت کی گرمی سے عوام پریشان نظر آرہے ہیں۔
کمٹہ میں عورت ہلاک: گرجدار آوازوں کے ساتھ گرنے والی بجلی سے پڑوسی تعلقہ کمٹہ میں ایک خاتون ہلاک ہونے کی اطلاع موصول ہوئی جس کی شناخت گوکرن کے دیونا دیہات کی شوبھا چندرکانت گوڈا کی حیثیت سے کی گئی ہے۔ بتایا گیا ہے کہ شوبھا رات کا کھاناکھانے کے بعد گھر میں سوئی ہوئی تھی دیررات قریب 2بجے بجلی گرنے سے عورت اپنے ہوش کھو بیٹھی ، کمٹہ سرکاری اسپتال میں علاج کے لئے داخل کیاگیا لیکن علاج کارگر نہ ہونے سے وہ چل بسی۔