دسمبر کے دوران ریاستی اسمبلی کے انتخابات ممکن: کمارسوامی
بنگلورو،2؍ جولائی(ایس او نیوز)سابق وزیر اعلیٰ اورجنتا دل(ایس) لیڈر ایچ ڈی کماسورامی نے پیش گوئی کی ہے کہ کرناٹک اسمبلی کے لئے انتخابات دسمبر 2022کے دوران کروائے جا سکتے ہیں۔
جے ڈی ایس کے دفتر جے پی بھون میں جنتا مترا پروگرام کا آغاز کرتے ہوئے انہوں نے کہا کہ بنگلورو میں جنتا دل(ایس) کے لئے کم از کم 15حلقو ں میں کامیابی حاصل کرنے کا امکان موجود ہے۔ انہوں نے کہا کہ اسمبلی انتخابات کے ساتھ پارٹی کارکنوں کو آنے والے بی بی ایم پی انتخابات کے لئے مستعد ہو جانا چاہئے۔ انہوں نے کہا کہ پارٹی کارکنان اس تاثر کو مٹا دیں کہ بنگلورو میں جنتا دل(ایس) کی کوئی سیاسی طاقت نہیں ہے۔ انہوں نے کہا کہ راجہ راجیشور ی نگر علاقے میں پارٹی کا ووٹ بینک موجود ہے، پارٹی کارکنوں کو چاہئے کہ آنے والے بی بی ایم پی انتخابات کے لئے تیاررہے۔
انہوں نے کہا کہ اسی طرح چامراج پیٹ، پلکیشی نگر اور مہالکشمی لے آؤٹ میں پارٹی کے اراکین اسمبلی کامیاب ہوئے تھے، لیکن ان لوگوں نے موقع پرستی کا مظاہرہ کرتے ہوئے دوسری پارٹیوں میں شمولیت اختیارکرلی۔ ان حلقوں میں پارٹی کی بنیادوں کو مضبوط کرنے کی ضرورت ہے۔ کرناٹک کی موجودہ حکومت کو لٹیری قرار دیتے ہوئے کمارسوامی نے کہا کہ حکومت کی طرف سے عوام کی جیب کاٹنے کا جو سلسلہ چل پڑا ہے،اس کو ختم کرنے کے لئے پارٹی کو کام کرنا ہو گا۔
کمارسوامی نے کہا کہ کرناٹک کو ترقی کی روش پر بحال کرنے کے لئے انہیں 15-20سال کی ضرورت نہیں۔ صرف پانچ سال میں وہ ریاست کو ترقی کی روش پر لے جائیں گے۔ انہوں نے کہا کہ جنتا مترا پروگرم 15دنوں تک چلے گا، اس پروگرام کے دوران پارٹی کارکن گھر گھر جاکر عوام سے رابطہ کریں اور پارٹی کے پیغام کو ان تک پہنچانے کی کوشش کریں۔ شہر میں پارٹی کارکنوں کا ایک بہت بڑا جلسہ عام17جولائی کو منظم کرنے کا فیصلہ لیا گیا ہے، اس میں ایک لاکھ سے زائد لوگوں کو جمع کرنے کی کوشش کی جائے گی۔ کمارسوامی نے کہا کہ دو قومی سیاسی جماعتوں کانگریس اور بی جے پی نے بنگلور کی ترقی کے لئے کچھ نہیں کیا۔ بی بی ایم پی میں دس سال پہلے شام ہونے والے علاقے بیاٹرائن پورا اور یلہنکا کے کئی محلہ آج بھی بنیادی سہولتوں سے محروم ہیں۔موجودہ حکومت نے بنگلورو کو سنگاپور بنانے کا اعلان کیا تھا لیکن اس نے شہر کو بدنما کر کے چھوڑ دیا ہے۔ کمارسوامی نے کہا کہ اگست میں پارٹی کی پنچ رتنا رتھ یاترا شروع ہو گی، اس کے بعد تین ماہ تک وہ بنگلورو کا رخ نہیں کریں گے۔ ریاست کے کونے کونے کا دور ہ کر کے عوام سے رابطہ قائم کریں گے۔
اس پروگرام میں سابق وزیر اعظم ایچ ڈی دیوے گوڈا، جنتا دل(ایس) کے ریاستی صدر سی ایم ابراہیم، رکن اسمبلی آر منجوناتھ، کیرلا کے جے ڈی ایس رکن اسمبلی اور وزیر کرشنن کٹی، کیرلا کے رکن اسمبلی تھامس میتھیو،سید محیط الطاف اور دیگر لیڈرس موجود تھے۔