ایس ایس ایل سی کے دو پرچوں کی دوبارہ جانچ کرنے پر بھٹکل انجمن کی کلثوم نے حاصل کئے چھ زائد مارکس؛ بن گئی انجمن کی ٹاپر
بھٹکل 5 ستمبر (ایس او نیوز) بھٹکل انجمن نوائط کالونی کی طالبہ کلثوم بنت سید عبدالقوی نے میتھس اور سائنس دو پرچوں کی دوبارہ جانچ کے لئے دی گئی درخواست کے بعد اس نے چھ زائد مارکس حاصل کرلئے ہیں جس کے نتیجے میں یہ طالبہ پورے انجمن میں اول نمبر پر پہنچنے میں کامیاب ہوگئی ہے۔ چھ زائد مارکس حاصل ہونے کےساتھ ہی ایس ایس ایل سی میں اس کے جملہ مارکس 601 سے سیدھے 607 ہوگئے ہیں جس کے نتیجے میں اس کی کامیابی کا تناسب بڑھتا ہوا 97.12 فیصد ہوگیا ہے اس کے ساتھ ہی کلثوم بھٹکل کے ٹاپ ٹین کی لسٹ میں نواں مقام حاصل کرنے میں بھی کامیاب ہوگئی ہے۔ اس سے قبل کلثوم کا تناسب 96.16 فیصد تھا اور وہ انجمن میں دوسرے نمبر پر تھی۔
انجمن نوائط کالونی ہائی اسکول کی اس طالبہ کو سائنس میں 93 اور میتھس میں 90 مارکس ملے تھے، کلثوم نے دونوں پیپرس کی دوبارہ جانچ کرانے (Revaluation) کی درخواست کی جس پر سائنس میں اسے پانچ زائد مارکس اور میتھس میں ایک زائد مارکس ملا اس طرح سائنس میں اس کے مارکس بڑھ کر 98 اور میتھس میں 91 ہوگئے ہیں۔ خیال رہے کہ کلثوم نے کنڑا اور سوشیل سائنس میں 99 مارکس حاصل کئے ہیں جبکہ اُردو میں اسے 125 میں 123 مارکس ملے ہیں۔