بنگلورو،21/جولائی (ایس او نیوز/ آئی این ایس انڈیا) کرناٹک میں کانگریس۔ جے ڈی ایس حکومت کے لئے بحران ختم ہوتا ہوا نظر نہیں آ رہا ہے،کل یعنی پیر کو وزیراعلیٰ ایچ ڈی کمارسوامی اعتمادووٹ پیش کریں گے، لیکن مخلوط حکومت کی اتحادی پارٹی بہوجن سماج پارٹی کے ممبر اسمبلی نے ووٹنگ میں شامل ہونے سے انکار کیا ہے۔بی ایس پی ممبر اسمبلی این مہیش نے کہا کہ میں اسمبلی سیشن میں شامل نہیں ہو پاؤں گا،پارٹی اعلیٰ کمان نے اعتماد ثابت کرنے کے عمل سے دور رہنے کو کہا ہے تو میں پیر اور منگل کو سیشن کے دوران موجود نہیں رہوں گا،میں اپنے حلقہ میں رہوں گا،کرناٹک میں جاری سیاسی بحران کا اختتام پیر کو ہو سکتا ہے۔کانگریس۔ جنتا دل سیکولر (جے ڈی ایس)اتحاد کی حکومت کو پیر کو ایوان میں اکثریت ثابت کرنا ہوگا۔گزشتہ جمعہ کو بھی کرناٹک میں سیاسی ڈرامہ دیکھنے کو ملا،جمعہ کوبھی ایوان میں اعتادووٹنگ نہیں ہو پائی،جس کے بعد اسمبلی کے صدر کے آر رمیش نے ایوان کی کارروائی 22 جولائی یعنی پیر تک ملتوی کر دی۔