بنگلورو،14؍ مئی (ایس او نیوز) ریاستی حکومت نے لاک ڈاؤن کے دوران اضلاع کے سفر کی شرائط میں مزید نرمی کا اعلان کرتے ہوئے 8؍ اضلاع پر مشتمل 2 زونس تشکیل دیئے ہیں جس کے ساتھ ہی ان اضلاع میں سفر کیلئے اب عوام کو کسی طرح کے پاس کی ضرورت نہیں  پڑے گی۔

لاک ڈاؤن کے باوجود معاشی سرگرمیوں کو بڑھاوا دینے کے مقصد سے بنگلورو اربن ضلع اور اس کے آس پاس آنے والے اضلاع بنگلورو رورل، رام نگرم، چکبالاپور، ٹمکورو اور کولار پر مشتمل ایک اور زون ترتیب دیا ہے اس زون کی ترتیب کے ساتھ ان اضلاع میں لوگوں کو آنے جانے کیلئے کسی طرح کے پاس کی ضرورت نہیں پڑے گی البتہ ہر ضلع اور چیک پوسٹ پر گاڑیوں کی جانچ کی جائے گی۔محکمہ صحت کے کارکنان اگر موجود ہوں تو گاڑیوں میں سفر کرنے والے افراد کی طبی جانچ بھی کی جاسکتی ہے۔ ان اضلاع کے درمیان صبح 7 بجے سے شام 7 بجے تک بغیر کسی رکاوٹ کے سفر کیا جاسکتا ہے۔

محکمہ ٹرانسپورٹ کی طرف سے جاری احکامات کے مطابق بنگلورو اربن ، بنگلورو رورل ، رام نگر، چکبالاپور، کولار اور ٹمکورو اضلاع کو سفر کیلئے ایک یونٹ قرار دیا جاچکا ہے۔ اسی طرح دکشن کنڑا اور اُڈپی اضلاع کو ایک یونٹ قرار دیا گیا ہے۔ احتیاطی طورپر ان اضلاع کے سفر پر جانے والے  افراد کی شاہراہوں پر موجود چیک پوسٹوں پر جانچ ہوگی۔

حکومت کی طرف سے یہ لازمی قرار دیا گیا کہ اضلاع کے سفر پر جانے والے افراد اپنے چہروں پر ماسک لازمی طور پر لگائیں۔ اس میں کسی طرح کی لاپروائی پر گاڑی کو ضلع میں داخل ہونے نہیں دیا جائے گا۔ آنے والے دنوں میں ریاستی حکومت کی طرف سے اور اضلاع پر مشتمل زونس ترتیب دیئے جانے کا امکان ہے تا کہ ریاست میں معاشی سرگرمیوں میں تیزی لائی جاسکے۔

17 ؍ مئی کو لاک ڈاؤن کا تیسرا مرحلہ ختم ہونے کے بعد یہ توقع کی جارہی ہے کہ اضلاع کے درمیان سفر کو آسان بنانے کے ساتھ ساتھ مشروط بنیاد پر لاک ڈاؤن میں نرمی لائی جائے گی اور ضرورت پڑنے پر سرکاری ٹرانسپورٹ خدمات بھی شروع کی جاسکتی ہیں۔