مینگلور: بس میں سفر کے دوران خاتون مسافر کے ساتھ جنسی زیادتی کرنے والا کنڈکٹر گرفتار؛ پتور بس ڈپو سے ہے کنڈکٹر کا تعلق
مینگلور 18/فروری (ایس او نیوز)خاتون مسافر کے ساتھ جنسی زیادتی کرنے کے الزام میں ایک کے ایس آر ٹی سی بس کنڈکٹر کو گرفتار کرلیا گیا ہے اور عدالت میں پیش کرتے ہوئے اُسے جوڈیشیل کسٹڈی میں بھیج دیا گیا ہے۔ گرفتار شدہ کنڈکٹر کی شناخت پتور بس ڈپو سے منسلک ایسوبو علی کی حیثیت سے کی گئی ہے۔
ذرائع سے ملی اطلاع کے مطابق15/فروری کو 21 سالہ خاتون مسافر ہاسن جانے کے لئے بنگلور کے یشونت پور کے قریب بس پر سوار ہوئی تھی، لیکن جیسے ہی بس آگے بڑھی، کچھ ہی دیر بعد کنڈکٹر اس کی بغل والی سیٹ پر آکر بیٹھ گیا اور نازیبا حرکتیں کرنے لگا، جس کو خاتون نے اپنے موبائل پر ریکارڈ کرلیا ، بتایا گیا ہے کہ کنڈکٹر نے اس کا موبائل چھیننے کی کوشش کی اور موبائل نمبر دینے پر اصرار کیا جس کے بعد خاتون نے کنڈکٹر کے گال پر ایک تھپڑ جُر دیا اور بیلّور کراس پر ہی بس سے اُترگئی اور دوسرے بس پر سوار ہوکر ہاسن پہنچ گئی۔ اس دوران اس نے موبائل پر ریکارڈ کی گئی وڈیو کو اپنے گھروالوں کے ساتھ شئیر کیا بعد میں سبرامنیا پولس تھانہ پہنچ کر کنڈکٹر کے خلاف معاملہ درج کرلیا۔
واقعےکی اطلاع ملتے ہی ایسوبو علی کو کے ایس آر ٹی سی نے اپنی خدمات سے معطل کر دیا اور پولس نے دفعہA 354 کے تحت اسے اتوار کے روز گرفتار کرلیا۔
خبر ملی ہے کہ ایسوبو علی اس سے قبل دھرمستھلا بس ڈپو میں ملازمت کرنے کے دوران مبینہ طور پر وہاں بھی اس طرح کی حرکت کی تھی جس کے بعد ایک تنظیم کے ارکان نے اس کی جم کر پیٹائی بھی کی تھی۔
