کورونامتاثرین کے ساتھ ناانصافی ناقابل برداشت، خاطیوں کوسزادینے حقوق انسانی کمیشن آگے آئے:ایچ کے پاٹل
بنگلورو،11؍جولائی (ایس او نیوز) کانگریس کے سینئرقائداورسابق ریاستی وزیرایچ کے پاٹل نے آج حکومت پر سخت برہمی ظاہرکرتے ہوئے کہا کہ کوروناوائرس کے پھیلاؤ سے عوام بری طرح متاثرہوئے ہیں،نہایت مشکل حالات سے دوچارعوام کے لیے مناسب علاج ومعالجہ کا نظم نہیں،یہاں تک کہ اچھے اسپتال دستیاب نہیں۔مزیددکھ کی بات یہ ہے کہ کوروناوائرس سے فوت ہونے والوں کی آخری رسومات صحیح ڈھنگ سے نہیں ہوپارہی ہیں۔کووڈسے فوت ہونے والوں کے ساتھ غیرانسانی سلوک اورتوہین آمیزطریقہ سے آخری رسومات اداکی جانے کی شکایات ہیں۔
انہوں نے کہاکہ یہ حقوق انسانی کی صریح خلاف ورزی ہے۔اس لیے حقوق انسانی کمیشن سے میری درخواست ہے کہ وہ اس معاملہ میں آگے آئیں اورکووڈمریضوں اورفوت شدگان سے ہورہی ناانصافی کے خلاف آوازبلندکریں۔ جوبھی حقوق انسانی کی خلاف ورزی کے مرتکب ہوں ان پرسخت کارروائی کا اقدام کریں۔ حقوق انسانی کمیشن کایہ فریضہ ہے کہ وہ جانی نقصان سے دوچارہونے والوں کے لیے معاوضہ فراہمی کویقینی بنائیں۔لیکن نہایت افسو س کا مقام ہے کہ حقوق انسانی کمیشن اپنی ذمہ داری کوبھول کرخاموش تماشائی بناہواہے۔جبکہ اس موقع پر انتہائی تندی اورچوکسی سے حقوق انسانی کی پامالی کوروکنے کے لیے آگے آناچاہئے تھا۔