راجیہ سبھاانتخابات میں بی جے پی کے تیسرے امیدوار کی کامیابی کیلئے سدارامیاہی ذمہ دار:ایشورپا
شیموگہ، 13؍جون(ایس او نیوز؍ایجنسی)راجیہ سبھاانتخابات میں بی جے پی کے تیسرے امیدوار کی کامیابی کیلئے سدارامیاہی اصل سبب ہیں۔یہ بات سابق ریاستی وزیر کے ایس ایشورپانے کہی۔
انہوں نے یہاں پارٹی کے ضلعی دفتر میں طلب کردہ اخباری کانفرنس سے خطاب کرتے ہوئے کہاکہ راجیہ سبھاانتخابات میں پارٹی کی طرف سے کامیاب ہوئے تینوں امیدواروں کو مبارکباد پیش کی جائے گی،اس کے علاوہ پارٹی کے تیسرے امیدوار لہر سنگھ کی کامیابی کیلئے اہم سبب بننے والے سابق وزیر اعلیٰ سدارامیا کا بھی شکریہ اداکیاجائے گا۔
ایشورپانے کہاکہ راجیہ سبھا انتخابات میں بی جے پی کے تیسرے امیدوار لہر سنگھ کی جیت اور کانگریس کے مسلم امیدوار اورجے ڈی ایس کے امیدوار کی شکست کیلئے راست ذمہ دار اپوزیشن لیڈر سدارامیاہی ہیں۔کانگریس پارٹی کے مسلم امیدوار کی شکست کا سبب بننے والے سدارامیاکی چال کو سمجھنے کی ضرورت ہے۔صرف بی جے پی کو فرقہ پرست ثابت کرنے کی کانگریس پارٹی کی کوشش ناکام ہوچکی ہے اور خود فرقہ پرست ہونے کا ثبوت دے دیاہے۔سدارامیا صرف مسلم امیدوارکی شکست کے ہی نہیں بلکہ جے ڈی ایس امیدوار کی شکست کیلئے بھی ذمہ دارہیں۔سدارامیا کے فیصلے سے ریاست میں سکیولر طاقتوں کو شکست ہوئی ہے۔سدارامیاکس کے حق میں کام کریں گے،یہ معلوم نہیں ہوسکے گا،ویراشیوا اور لنگایت طبقے کو توڑنے کی کوشش بھی انہوں نے ہی کی تھی۔
اس اخباری کانفرنس میں ڈپٹی میئر شنکر گنی،کارپوریٹر ایس این چنابسپا، گنانیشور،کے وی اپنااوردیگرموجود تھے۔