بنگلورو،16؍جون(ایس او  نیوز) پردیش کانگریس کمیٹی(کے پی سی سی) صدر دنیش گنڈو راؤ نے کہا کہ جندال کمپنی کے لئے زمین فروخت کرنے کے معاملہ میں ریاستی حکومت نے سب کمیٹی تشکیل دی ہے۔ انہوں نے کہا کہ بھارتیہ جنتا پارٹی (بی جے پی) یا کسی اور کو شبہ ہو تو ایسے افراد کمیٹی کے سامنے اپنی شکایتیں پیش کرسکتے ہیں۔ انہوں نے کہا کہ سب کمیٹی تمام کے شکوک و شبہات کو مد نظر رکھ کر حکومت کو اپنی رپورٹ پیش کرے گی جس کے بعد حکومت قطعی فیصلہ کرے گی۔شہر کے اوکلی پورم میں 8لائن کاریڈار کا معائنہ کرنے کے بعد اخباری نمائندوں سے انہوں نے کہا کہ سابق وزیر اعلیٰ بی ایس ایڈی یورپا جندال کمپنی کو زمین فراہم کرنے کے معاملہ میں کیوں مخالفت کررہے یہ سمجھ سے باہر ہے۔ دنیش گنڈو راؤ نے بتایا کہ جس وقت بی جے پی برسر اقتدار تھی اسی وقت ہی جندال کمپنی کو کنٹراکٹ اور سیل ڈیڈ دینے کے لئے منظوری دی گئی تھی۔ اب کیوں اس کی مخالفت کررہے ہیں، تعجب کی بات ہے۔ انہوں نے بتایا کہ 8ماہ کے بعد دوبارہ کابینہ توسیع ہوگی۔ اس وقت پارٹی کے سینئر اورناراض اراکین اسمبلی کو موقع دیا جائے گا۔ اس وقت تک صبرو تحمل کے ساتھ کام کرنا چاہئے۔ انہوں نے صاف طو رپرکہا کہ پردیش کا نگریس کمیٹی کے عہدے سے استعفیٰ دینے کی خبروں میں کوئی صداقت نہیں اور نہ ہی انہوں نے ایسا کوئی قدم اٹھایا ہے۔ انہوں نے کہا کہ اس طرح کی خبر کس نے پھیلائی ہے،اس کا انہیں علم نہیں ہے۔ انہوں نے اب تک اپنے عہدے سے استعفیٰ کیلئے کوئی بھی مکتوب پارٹی اعلیٰ کمان کو روانہ نہیں کیا۔ انہوں نے کہا کہ وہ پارٹی کے ایماندار کارکن کی طرح پارٹی کو مضبوط و مستحکم کرنے کیلئے اپنی جدوجہد میں لگے ہوئے ہیں۔ پارٹی نے ان کو جو ذمہ داری سونپی ہے اس کو پوری ایمانداری کے ساتھ نبھا رہے ہیں۔ اس موقع پر میئر گنگامبیکے ملیکارجن نے کہا کہ آئندہ 4ماہ کے اندر اوکلی پورم میں جاری 8لائن کاریڈور کاتعمیری کام مکمل کیا جائے گا اور عوام کے استعمال کیلئے مکمل طو رپر کھول دیا جائے گا۔ انہوں نے تعمیری کاموں میں تیزی لانے کی ہدایت دی اور20دن کے اندر دو نئے لائن پر سواریوں کے گزرنے کا موقع فراہم کرنے کا بھی حکم دیا۔ قبل ازیں میئر نے فریڈم پارک میں بروہت بنگلورمہا نگرپالیکے (بی بی ایم پی) کی جانب سے جاری ملٹی اسٹورٹ پارکنگ عمارت کے تعمیری کاموں کابھی معائنہ کیا۔79کروڑ روپیوں کی لاگت سے مذکورہ عمارت تعمیر کی جارہی ہے۔ انہوں نے بتایا کہ اگلے 4ماہ کے اندر اس عمارت کاتعمیری کام بھی مکمل کرلیا جائے گا۔ اس موقع پر میئر کے ہمراہ بی بی ایم پی میں بر سراقتدار پارٹی کے لیڈر عبدالواجد، چیف انجینئر کے ٹی۔ ناگراج کے علاوہ بی بی ایم پی کے اعلیٰ افسر شریک تھے۔