بھٹکل میں ینگ اسٹار ویلفئیر آرگنائزیشن کی جانب سے مفت ختنہ کیمپ کا کامیاب انعقاد
بھٹکل 16/اپریل (ایس او نیوز) یہاں مدینہ کالونی ، محی الدین اسٹریٹ میں علاقے کا فعال ادارہ ینگ اسٹار ویلفئیر آرگنائزیشن کی جانب سے آج منگل کو مفت ختنہ کیمپ کا انعقاد کیا گیا جس میں 42 بچوں کا ختنہ کرایا گیا۔ صبح آٹھ بجے ینگ اسٹار کے صدر مولانا احمد کبیر ندوی کی دُعا کے ساتھ کیمپ کا آغاز کیا گیا، اس موقع پر جنرل سکریٹری جناب ظہیر احمد شیخ نے بتایا کہ ینگ اسٹار کی جانب سے علاقہ کے مسائل کو حل کرنے مختلف پروگرام ترتیب دئے جاتے رہے ہیں ، جس میں ختنہ کیمپ بھی ایک ہے، انہوں نے بتایا کہ ادارہ کی طرف سے تیسری مرتبہ ختنہ کیمپ کا انعقاد کیا گیا ہے۔
ختنہ کے ماہر جناب صادق صاحب نے بچوں کا ختنہ کرایا، ان کے معاون جناب محسن صاحب نے ان کا پورا ساتھ دیا۔
اختتامی اجلاس میں قومی سماجی ادارہ مجلس اصلاح و تنظیم بھٹکل کے جنرل سکریٹری جناب عبدالرقیب ایم جے ندوی نے خطاب کرتے ہوئے ینگ اسٹار کی خدمات کی سراہنا کی اور کہا کہ علاقہ کے مسائل کو حل کرنے اور دوسروں کی مدد کرنے میں یہ ادارہ ہمیشہ فعال رہا ہے۔ انہوں نے اس موقع پر اپنی نیک تمنائیں پیش کیں، بھٹکل مسلم یوتھ فیڈریشن کے صدر امتیاز اُدیاور، پاپولر فرنٹ آف انڈیا کے مقامی صدر عبدالکریم، شہر کے نوجوان وکیل عمران لنکا، جالی پٹن پنچایت کے سابق صدر جناب آدم پنمبوراور سماجی کارکن جناب نذیر قاسمجی نے بھی اس موقع پر ینگ اسٹار کی خدمات کو سراہتے ہوئے ختنہ کیمپ کے کامیاب انعقاد پر مبارکباد پیش کی۔ ینگ اسٹار کے سماجی سکریٹری سُہیل کداری، محی الدین مسجد کے امام مولانا ابوصالح اور مسجد کے ذمہ دار جناب شبر خطیب سمیت کافی ذمہ داران اور علاقہ کے لوگ موجود تھے۔ ینگ اسٹار کے صدر مولانا احمد کبیر ندوی کی نظامت اور ان ہی کے کلمہ تشکر کے بعد دُعا پر جلسہ برخواست ہوا۔