کنُّور(کیرلا):2؍ فروری (ایس اؤ نیوز ) چلتی ہوئی کار میں اچانک آگ لگنے سے آٹھ ماہ کی حاملہ عورت اور اس کا شوہر جل کر خاکستر ہونےکا واقعہ جمعرات کو کیرلا کےکنور میں پیش آیاہے۔
مہلوکین کی شناخت پرجیت(32) اور اس کی حاملہ بیوی ریشا(26) کی حیثیت سے کی گئی ہے۔ بتایاگیا ہےکہ دونوں میاں بیوی دیگر چار رشتہ داروں کے ساتھ کُٹِّیتور سے ضلع اسپتال جانے کےلئے ماروتی سوزوکی کار پر سوارہوکر نکلے تھے۔ راستے میں اچانک کار آگ حادثےکا شکار ہوئی توکارکی پچھلی سیٹ پربیٹھےہوئےچار لوگوں نے باہر چھلانگ لگاکر اپنی جان بچالی،مگر اگلی سیٹ پر سوار میاں بیوی کار سےباہر نہ نکل سکے اور زندہ جل کر ہلاک ہوگئے۔
ذرائع سے ملی اطلاع کے مطابق گھر میں جب حاملہ ریشا کو درد زہ شروع ہوا تو خاندان والوں نےزچگی کاامکان لگاتےہوئے ضلع اسپتال کےلئے نکلے تھے۔گھر سے قریب 25 کلو میٹر کا فاصلہ طےکرچکےتھےاوراسپتال پہنچنے کےلئے صرف200میٹرکی دوری باقی تھی کہ اچانک کار میں آگ بھڑک اُٹھی اور آگ اتنی تیزی کے ساتھ پھیلی کے اگلی سیٹ پر سوار شوہر اور بیوی کو کار سے باہر نکلنے کا بھی موقع نہیں مل سکا۔
عینی شاہدین نے بتایا کہ قریب سے گزرنے والے کاروالوں نے کار کے بونٹ کے نیچے آگ دیکھی اور پراجیت کو خبردار کیا، جو کار چلا رہا تھا۔ آگ لگنے کی بات معلوم ہوتے ہی پراجیت نے گاڑی روکی لیکن کار کے سامنے والے مسافر کا دروازہ اور ڈرائیور کا دروازہ جام ہوگیا تھا، اس نے فوراً پیچھے کا دروازہ کھولا اور پچھلی سیٹ پر سوار لوگوں کو کار سے باہر دھکیل دیا۔ پراجیت کی بیٹی سری پاروتی(8)، پراجیت کے والدین کُزِکل وشواناتھن اور شوبھا، اورپراجیت کی خالہ سجینا بچ نکلنے میں کامیاب ہوگئے۔ لیکن آگ کار کے اگلے حصے کو اپنی لپیٹ میں لیتے ہوئے پٹرول اور ہوا کےذریعے تیزی کے ساتھ بھڑک اُٹھی تھی، پچھلی سیٹ پر سوار اس کے ماں باپ نے لوگوں سے مدد کے لئے چلایا لیکن آگ اتنی تیزتھی کہ لوگ مدد نہ کرسکے۔
بتایا گیا ہے کہ 500 میٹر دور فائر اینڈ ریسکیو اسٹیشن کے اہلکار منٹوں میں جائے وقوع پر پہنچ گئے۔ لیکن اُس وقت تک کار پوری طرح جل چکی تھی۔ وہ صرف جوڑے کی جلی ہوئی باقیات کو بازیافت کر سکے۔