مڈیکیرے : کووڈ جانچ کی نقلی نگیٹیو رپورٹ پیش کرنے پر جوڑے کو کیا گیا گرفتار
مڈیکیرے،14؍ اگست (ایس او نیوز) کیرالہ کے ایک جوڑے کو کوڈاگو ضلع کے اماٹی چیک پوسٹ پر اس وقت گرفتار کیا گیا جب انہوں نے ضلع میں داخل ہونے کے لئے کووڈ نگییٹو رپورٹ پیش کی اور جانچ کرنے پر وہ نقلی نکلی ۔
موصولہ رپورٹ کے مطابق ضلع کاسرگوڈ میں منجیشور کے رہنے والے سید محمد (32سال) نے اپنی بیوی عائشہ رحمٰن کے ساتھ اپنی سسرال جانے کے لئے یہ آر ٹی پی سی آر نگیٹیو جانچ رپورٹ اپنے پاس رکھی تھی ۔ جب میاں بیوی اپنی آلٹو کار میں سولیا میں واقع چیک پوسٹ پر پہنچے تو وہاں کافی بھیڑ تھی ۔ وہاں پر موجود عملہ نے سرسری طور پر جانچ رپورٹ دیکھنے کے بعد انہیں آگے بڑھنے کی اجازت دے دی ۔ لیکن جب وہ لوگ عائشہ کے مائکے ایمامڈو کے پاس اماٹی چیک پوسٹ پر پہنچے تو وہاں پر کووڈ نگیٹیو کی سرٹفکیٹ کی جانچ کی گئی اور کیو آر کوڈ اسکین کرنے پر دونوں کی رپورٹ پر شرف الدین نا٘می شخص کا نام پایا گیا ۔ اس سے ثابت ہوگیا کہ انہوں نے کسی اور شخص کی رپورٹ کی نقل میں ہیر پھیر کرکے جعلی رپورٹ پیش کرنے کی کوشش کی تھی ۔
تفتیش کرنے پر اس جوڑے نے اس بات کا اعتراف کرتے ہوئے بتایا کہ اس طرح کی سرٹفکیٹس کیرالہ کے منجیشور میں دستیاب ہوتے ہیں ۔ ویراجپیٹ پولیس نے پینڈیمک ایکٹ کے تحت اس جوڑے کو گرفتار کرکے عدالت میں پیش کیا جہاں سے انہیں عدالتی حراست میں بھیج دیا گیا ۔ اس کے علاوہ پولیس نے آلٹو کار بھی ضبط کرلی ۔