بنگلورو،5؍نومبر(ایس او نیوز) سابق وزیراعلیٰ اور ریاستی اسمبلی کے اپوزیشن لیڈر سدارامیا نے کہا ہے کہ وزیراعظم مودی نے ملک کے عوام کو یہ بتادیا ہے کہ اگر بی جے پی کوشکست دی جائے تو پٹرول کی قیمت کم ہوجائے گی۔

اپنے ٹوئٹر پر اس سلسلہ میں سلسلہ وار ٹوئٹ کرتے ہوئے سدرامیا نے کہا کہ جس دن بی جے پی کو اقتدار سے بے دخل کردیا جائے گا ملک میں پٹرول کی قیمت فی لیٹر50روپئے ہوجائے گی۔

انہوں نے کہا کہ مرکزی حکومت نے ڈیزل پر ایکسائز ڈیوٹی میں دس روپئے اور پٹرول پر 5روپئے کی تخفیف کی جس کے بعد ریاستی حکومت نے 7-7روپئے کی کمی کی ہے۔ دونوں حکومتوں کا یہ فیصلہ خوش آئند ہے۔انہوں نے کہا کہ ایسے مرحلے میں جب کہ بین الاقوامی بازاروں میں خام تیل کی قیمت فی بیرل82ڈالر ہے، مرکزی حکومت کو قیمت میں اور زیادہ کمی لانی چاہئے تھی۔اس وقت جبکہ بین الاقوامی بازار میں خام تیل کی قیمت 125ڈالر تھی اور ملک میں پٹرول کی قیمت65روپئے فی لیٹر تھی۔اس وقت بی جے پی نے سارے ملک میں مہنگائی کے مسئلہ پر ہنگامہ کیا اور پٹرول کی قیمت کو بہت زیادہ قرار دے کر اس وقت کی منموہن سنگھ حکومت کو بدنام کیا۔اب جبکہ ملک میں پٹرول کی قیمت 110روپئے سے متجاوز ہوچکی ہے محض 5یا7روپئے گھٹا کر بی جے پی حکومت یہ تاثر دینے کی کوشش کررہی ہے کہ اس نے عوام پر بہت بڑا احسان کردیا ہے۔

سدارامیا نے کہا کہ پکوان گیس سلنڈر کی قیمت ایک ہزار روپئے سے متجاوز ہوچکی ہے۔خوردنی اناج کی قیمتیں آسمان سے باتیں کررہی ہیں۔آنے والے ددنوں میں بھی اگر بی جے پی کو مسلسل ہراتے رہیں گے تو ممکن ہے کہ ملک میں مہنگائی کافی حد تک کم ہوجائے۔