کاسرگوڈ10/جولائی (ایس او نیوز) منگل کی شام کو کنہانگڈ کے قریب موٹر بائک اور کار کے درمیان زبردست ٹکر ہوئی جس کے نتیجے میں بائک سوار ہلاک ہوگیا جس کی شناخت ابھیلاش (26سال) کے طور پر کی گئی ہے۔

 موٹر بائک سے کارٹکرانے کی وجہ سے ابھیلاش کو گہری چوٹیں آئی تھیں۔علاج کے لئے اس کو اسپتال منتقل کیا گیامگر اس کی جان بچائی نہیں جاسکی۔ بتایا جاتا ہے کہ ابھیلاش وائرنگ کا کام کیا کرتا تھا۔ اس حادثے کے تعلق سے ہوسادرگا پولیس اسیشن میں کیس درج کردیا گیا ہے۔

 دوسرا حادثہ موگرال پتور نیشنل ہائی وے پر پیش آیا جس میں بارھویں کلاس میں پڑھنے والا طالب علم جاں بحق ہوگیا، جس کی شناخت امان(17سال) کے طور پر کی گئی ہے،جبکہ مناظر نامی نوجون شدید زخمی ہوگیا ہے۔ معلوم ہوا ہے کہ اس حادثے میں بھی ایک کار نے بڑی تیزرفتاری کے ساتھ اس موٹر بائک کو ٹکر ماری جسے موگرال کا رہنے والا مناظر (22سال)چلا رہا تھااور پیچھے امان بیٹھا ہوا تھا۔ ٹکر اتنی شدید تھی دونوں نوجوان اچھل کر دور سڑک پر جاگرے جس کی وجہ سے انہیں گہرے زخم آئے۔ امان کو منگلورو کے ایک نجی اسپتال میں داخل کیا گیاتھا مگر علاج کارگر نہیں ہوا اس نے دم توڑ دیا۔ مناظرکو کاسرگوڈ کے نجی اسپتال میں داخل کیا گیا ہے جہاں اس کی حالت نازک بتائی جارہی ہے۔مناظرکے تعلق سے معلوم ہوا ہے کہ وہ کومبلے کے ایک پٹرول بنک میں ملازمت کیا کرتا تھا۔اس حادثے کے تعلق سے کاسرگوڈ پولیس اسٹیشن میں کیس درج کرلیا گیا ہے۔