کاسرگوڈ16/فروری (ایس او نیوز) کاسرگوڈ ڈسٹرکٹ ایڈیشنل سیشنس کورٹ نے نابالغ طالبات کے ساتھ جنسی ہراسانی کا جرم ثابت ہونے پر نیرچلوملاڈکا (32سال) نامی اسکول ٹیچر کو 15سال قید اور 35ہزار روپے جرمانہ کی سزا سنائی ہے۔

موصولہ رپورٹ کے مطابق یہ معاملہ 2012اور2014کے دوران پیش آیا تھا۔ اور اس کاپردہ اس وقت فاش ہوگیا جب تیسری جماعت میں زیر تعلیم ایک بچی نے اپنی دوسری ہم جماعت لڑکی کو یہ بات بتائی۔جس کے بعداس لڑکی کے والدین کو اس کی خبر دی گئی۔بچیوں کے والدین اور سرپرستوں نے  بچوں کے حقوق کے لئے قائم ’چائلڈ لائن‘ محکمے کے پاس شکایت درج کروائی اور کاسرگوڈ ٹاؤن پولیس اسٹیشن میں پوکسو ایکٹ کے تحت کیس درج کیا گیا۔ 

تحقیقات کے دوران 26عینی شاہدین نے اپنے عدالت میں گواہی تھی۔ اس کے علاوہ جرم کو ثابت کرنے والی 32چیزیں عدالت کے سامنے رکھی گئیں۔ عدالت نے سزا سناتے ہوئے کہا کہ اگر مجرم نے جرمانے کی رقم ادا نہیں کی تو اسے مزید 2سال قید کی سزا بھگتنا پڑے گا۔عدالت لیگل سروس اتھاریٹی کو بھی ہدایت دی ہے جنسی ہراسانی سے متاثرہ بچیوں کو مناسب مالی امداد بھی ادا کی جائے۔