کاروارنوجوان کی رپورٹ کورونا پوزیٹو؛ کاروار سرحد کو عبورکرکے پہنچا تھا گوا
بھٹکل 17/مئی (ایس او نیوز) کاروار سرحد کو عبور کرکے پڑوسی ریاست گوا جانے کے بعد نوجوان کی رپورٹ کورونا پوزیٹو آنے کی اطلاع موصول ہوئی ہے۔ ذرائع سے ملی اطلاع کے مطابق 14 مئی کو کاروار کے قریب جوئیڈا کا رہنے والا یہ نوجوان دیگر ورکروں کے ساتھ ماجالی سے پولم چیک پوسٹ کے ذریعے گوا میں داخل ہوا تھا، اسے گوا میں داخل ہونے پر واسکو میں اس کے تھوک کے سیمپل لئے گئے تھے اور اسے واسکو میں ہی کورنٹائن کیا گیا تھا۔ آج اتوار کو اس کی رپورٹ پوزیٹو آئی ہے۔
پتہ چلا ہے کہ 23 سالہ یہ نوجوان گوا کی کسی فارمیسی میں ملازمت کرتا ہے۔ بتایا گیا ہے کہ گوا جانے کے دوران کاروار چیک پوسٹ پر اس نوجوان کی اسکریننگ کی گئی تھی ، پھر واسکو میں اس کے تھوک کے سیمپل حاصل کئے گئے تھے اور جانچ کے لئے روانہ کئے گئے تھے۔
گوا سے ملی اطلاع کے مطابق اس نوجوان کی رپورٹ کورونا پوزیٹو آنے پر گوا میں کورونا سے متاثرہ مریضوں کی تعداد بڑھ کر 19 ہوگئی ہے۔