کاروار،12/نومبر (ایس او نیوز) نوکری دلانے کے بہانے لوگوں کو دھوکہ دینے کے الزام میں گرفتار ملزم نے اپنے ساتھ پولیس کے ذریعے بدسلوکی کرتے ہوئے حملہ کرنے کا الزام لگایا ہے۔
معلوم ہوا ہے کہ ملزم کی طرف سے عدالت میں پولیس پر الزام لگائے جانے کے بعد عدالت نے پولیس کو وجہ بتاؤ نوٹس جاری کیا ہے اور ملزم کی طبی جانچ کرنے کی ہدایت دی ہے۔کاروار تعلقہ کے شیرواڈ کے رہنے والے ماروین ڈیسوزا اور یلاپور منچے کیری کی رہنے والی اس کی دوست انکیتارائیکر پربرٹش ایئر لایئنز میں نوکری دلانے کے بہانے لوگوں کو ٹھگنے کا الزام لگاتے ہوئے ٹاؤن پولیس اسٹیشن میں 14نومبر کوشکایت درج کی گئی تھی۔ملزمین نے عدالت میں پیشگی ضمانت کی عرضی داخل کی تھی اور 24اکتوبر کو انہیں پیشگی ضمانت مل گئی تھی۔عدالت نے ملزمین کو کیس کی تحقیقات کے لئے پولیس اسٹیشن میں حاضر ہونے کی ہدایت دی تھی۔
بتایا جاتا ہے کہ عدالت کے حکم کی تعمیل میں جب ماروین اور انکیتا ٹاؤن پولیس اسٹیشن پہنچے تو وہاں پہلے سے ہی ایک دوسرا کیس ان پر درج کیا جاچکا تھا۔ اور اس کیس میں پولیس نے ان دونوں کوگرفتار کرکے جیل میں بھیج دیا۔ماروین کے والدین کا کہنا ہے کہ اس دوران پولیس نے ماروین پر حملہ کیا ہے۔جبکہ انکیتا کے بھائی اکشئے رائیکر نے الزام لگایا ہے کہ”میری بہن کے ساتھ پولیس نے بدسلوکی کی ہے۔اس کے ساتھ بدزبانی کی گئی ہے۔ جب پولیس اسٹیشن میں ہم لوگ وہاں گئے تو ہمیں ملاقات کرنے کا موقع نہیں دیا گیا۔اسے کمرے کے ایک کونے میں تنہا بٹھا کر پوچھ تاچھ کی جارہی تھی۔ اس کے ساتھ عصمت دری کرنے کی دھمکیاں دی گئیں۔“ اکشئے نے اپیل کی ہے کہ اس کی بہن پولیس کے برتاؤ سے بری طرح خوف زدہ ہوگئی ہے۔ اور ذہنی طور پر بہت پریشان ہے۔ اس لئے اس کی بہن کو پولیس کی زیادتیوں سے تحفظ فراہم کیا جائے۔
عدالت میں ملزم ماروین کے وکیل نے عدالت میں درخواست داخل کی تھی کہ اس کے مؤکل کو طبی امداد فراہم کی جائے۔ اس پر عدالت نے جیل سپرنٹنڈنٹ کو ہدایت دی ہے کہ ملزم کا علاج ومعالجہ کیا جائے۔