کاروار 15 / مارچ (ایس او نیوز) درپیش اسمبلی الیکشن کی تیاریوں کا جائزہ لینے کے لئے مرکزی الیکشن کمیشن کی ریاست میں آمد کے موقع پر ضلع الیکشن آفیسر پربھو لنگا  کولیکّٹی نے ضلع سطح پر الیکشن کی کارروائی بحسن و خوبی انجام دینے کے لئے افسران کی تربیت کا اہتمام کیا ۔

    ضلع ڈپٹی کمشنر کے دفتر میں واقع میٹنگ ہال میں الیکشن آفیسر اور معاون الیکشن آفیسر کی ذمہ داریاں نبھانے والے افسران کے لئے منعقدہ اس تربیتی اجلاس سے  خطاب کرتے ہوئے انہوں نے درپیش اسمبلی الیکشن اور اس کے انعقاد کے سلسلے میں قانونی نکات اور اصولی باتوں کا خلاصہ کیا اور ماڈل کوڈ آف کنڈکٹ نافذ کرنے کے سلسلے میں ضروری ہدایات دیں ۔ 

    انہوں نے افسران کو ہدایت دی کہ ووٹر لسٹ سے متعلق تمام امور کے علاوہ پولنگ بوتھ ، سیاسی پارٹیوں اور امیدواروں کی طرف سے ملنے والی شکایات وغیرہ نپٹانے کے سلسلے میں اپنے آپ کو تیار کرلیں ۔ اور مرکزی الیکشن کمیشن کی ضلع میں آمد کے موقع پر اگر ضروری ہو تو اس ضمن میں معلومات پیش کرنے کے لئے تیار رہیں ۔ انہوں نے واضح کیا کہ الیکشن کے انعقاد میں اگر کوئی کوتاہی یا غلطی ہوتی ہے تو اس کی تمام تر ذمہ داری متعلقہ افسر پر ہوگی ۔