ضلع شمالی کینرا میں آئندہ15دنوں تک جاری رہیں گے سخت حفاظتی انتظامات۔ ڈپٹی کمشنر ڈاکٹر ہریش کمار کا بیان
کاروار 9/نومبر (ایس ا ونیوز) ضلع اُترکنڑا کے ڈپٹی کمشنر ڈاکٹر ہریش کما ر نے اخباری بیان جاری کرتے ہوئے کہا ہے کہ بابری مسجد تنازع کے سلسلے میں سپریم کورٹ سے جو فیصلہ آیا ہے اس پس منظر میں کسی بھی قسم کے ناخوشگوار واقعے سے بچنے اور ضلع میں امن وامان بنائے رکھنے کے لئے تمام طرح کے اقدامات کیے جائیں گے۔
ڈی سی نے بتایا کہ فی الحال پٹاخے پھوڑنے، بارودی چیزیں اپنے پاس رکھنے، شراب فروشی اور اس کی سپلائی وغیرہ پر پابندی لگا دی گئی ہے۔مزید پندرہ دنوں تک ناخوشگوار واقعات کی روک تھام کے لئے سخت حفاظتی انتظامات کیے گئے ہیں۔ انہوں نے کہا کہ ضلع میں امن و امان کا ماحول بنائے رکھنے کے لئے تمام اسسٹنٹ کمشنرز اور تحصیلداروں، اور ای او کے ساتھ احتیاطی تدابیر اختیار کرنے کے سلسلے میں مشورہ کیا گیا ہے، اور انہیں ہدایت دی گئی ہے کہ صرف دو دنوں کے لئے ہی امتناعی احکامات کو محدود نہ رکھتے ہوئے آئندہ پندرہ دنوں تک حالات پر نظر بنائے رکھیں۔
ڈپٹی کمشنر نے کہا کہ ضلع میں بھائی چارگی اور امن و امان کو بڑھاوادینے کے لئے یہ ایک بہترین موقع ہے۔ اس لئے افسران کو ہدایت دی گئی ہے کہ مختلف طبقات اور قوموں کو اعتماد میں لیتے ہوئے مذہبی پروگرام اور تہوار منانے کے مواقع دئے جائیں۔
ضلع سپرنٹنڈنٹ آف پولیس شیو پرکاش نے کہا کہ پٹاخوں اور شراب کے علاوہ ڈی جے کے استعمال پر بھی پوری طرح پابندی لگائی گئی ہے۔آئندہ 15دنوں کے اندر کسی کو بھی اگر کوئی پروگرام منعقدکرنا ہوتو اس کے لئے پیشگی اجازت لینا ضروری ہوگا۔اس کے علاوہ سوشیل میڈیا پر پوری طرح نظر رکھی جارہی ہے۔ اگر کسی نے بھی قابل اعتراض مواد پوسٹ کیا تو ایسے شخص کو وارنٹ کے بغیر گرفتار کرلیا جائے گا۔