بھٹکل 4؍جون(ایس اؤ نیوز)کرناٹک اسمبلی انتخابات سے قبل کانگریس نے ووٹروں کو لبھانے کے لئے جن پانچ گیارنٹیوں کا وعدہ کیا تھا، انتخابات میں جیت درج کرتے ہی پانچوں گیارنٹیوں کولاگو کرکے کانگریس نے مخالف سیاسی پارٹیوں کوبیک فُٹ پرپہنچادیا ہے۔ مرکز کی بی جے پی حکومت کے وعدوں اور کانگریس کی جانب سے کئے گئے وعدوں کو عوام کے سامنے اب اس انداز میں پیش کیا جارہا ہے کہ بی جے پی جھوٹے وعدے کرتی ہے اورصرف زبانی دعوے کرتی رہتی ہے، جبکہ کانگریس عوام کے ساتھ کئے گئے وعدوں کو پورا بھی کرتی ہے اور ملک کے تمام عوام کو ساتھ لے کر چلتی ہے۔

کہا جارہا ہے کہ کانگریس اپنی ان پانچ گیارنٹیوں کوآئندہ ہونےوالے لوک سبھا، ضلع پنچایت اور تعلقہ پنچایت انتخابات میں زبردست مُکّے کے طور پر استعمال کرے گی اوراپنے لئے موافق حالات پیدا کرنے میں کامیاب ہوجائے گی۔

سمجھا جارہا تھا کہ اسمبلی انتخابات میں جیت حاصل کرنے کے بعد اقتدار سنبھالنے والی کانگریس پارٹی کو تشہیری مہم کے دوران کئےگئے5وعدوں کو نافذ کرنا چیلنج بن جائے گا مگرکابینہ کی تشکیل و توسیع کے بعد وزیر اعلیٰ سدرامیا نے بیک وقت جب ان پانچوں وعدوں کو نافذ کرتے ہوئے عوام کےلئے جاری کرنے کا اعلان کیا تو ظاہربات ہے کہ مخالف سیاسی پارٹیوں کی کمر ٹوٹ گئی۔ اب کاںگریس ان ہی 5 گیارنٹیوں اور اس کے نفاذ کو آئندہ انتخابات میں ایک ہتھیار کے طور پر استعمال کرے گی۔ عوام سے کئے گئے وعدوں کو پورا کرنے کے ساتھ ہی کانگریس پارٹی کے حوصلے اب بلند ہوگئے ہیں اورسمجھا جارہا ہے کہ اس ہتھیارکے ذریعے کانگریس ضلع و تعلقہ پنچایت میں بھی بی جےپی کو زبردست مُکا مارنے کی تیاریوں میں ہے۔