کاروار :23؍مئی  (ایس اؤ نیوز) ریاستی الیکشن کمیشن ریاست میں ضلع اور تعلقہ پنچایت انتخابات کی تیاری میں ہے۔ اس سے قبل تشکیل دئیے گئے حلقہ وار ریزرویشن کی معلومات کو دوبارہ ارسال کرنے کا ضلع انتظامیہ کو ہدایت دی گئی ہے۔ اب انتخابات اسی ریزرویشن کی بنیاد پرکرائے جائیں گے یا پھر نئے سرے سے حلقوں کی تشکیل کرکے منعقد کرائے جائیں گے واضح نہیں ہے۔

سپریم کورٹ نے مدھیہ پردیش کی حکومت کو او بی سی ریزرویشن کے بہانے انتخابات کو ملتوی کرنے کو صحیح قرار نہ دیتےہوئے انتخابات منعقد کرنے کی ہدایت جاری کرتےہوئے کہاتھا کہ یہ صرف مدھیہ پردیش کے لئے ہی نہیں ہے بلکہ ملک کی سبھی ریاستوں پر اطلاق ہوگا۔ تو اس طرح ریاست میں بھی ضلع اور تعلقہ پنچایت انتخابات ہونے باقی ہیں سپریم کورٹ کا حکم ریاست پر لاگو ہوگا تو الیکشن کمیشن متحرک ہوگیا ہے۔ اسی دوران مدھیہ پردیش حکومت نے  رٹ عرضی داخل کرتے ہوئے ریزرویشن کےمتعلق کمیٹی کی رپورٹ پر انتخابات منعقد کرانے کی درخواست کی  تھی تو سپریم کورٹ نے اس سے اتفاق کیا تھا۔ اب ریاستی حکومت پیچیدگی کا شکار ہے کہ وہ او بی سی ریزرویشن کی بنیاد پر ہی انتخابات کرائے  یا پھر سپریم کورٹ پچھلے حکم کے مطابق انتخابات منعقد کرائے۔ اسی پیچیدگی کے دوران الیکشن کمیشن انتخابات کی تیاریوں میں جٹ گیا ہے۔ یہ سب کچھ اپنے وقت پر ہوجاتاہے تو اگلے دومہینوں میں ضلع اور تعلقہ پنچایت کے لئے انتخابات منعقد ہونےکے امکانات ہیں۔

کمیشن نے مانگی ضلع انتظامیہ سے جانکاری :ریاستی الیکشن کمیشن نے ضلع انتظامیہ سے ضلع اور تعلقہ پنچایت انتخابات کے حلقوں اور ریزرویشن کے متعلق جانکاری مانگی ہے۔ساتھ ہی یہ بھی کہاہے کہ  پچھلے کئے گئے حلقوں کی ریزرویشن اور نئے طورپر حلقوں کی تشکیل کے بعد کتنے حلقے ہونگے اس کی تفصیلی رپورٹ دیں۔ الیکشن کمیشن نے ہر تعلقہ میں ضلع پنچایت اور تعلقہ پنچایت حلقوں کی تعداد کی بھی جانکاری طلب کی ہے۔

ضلع پنچایت کے 40حلقے :اترکنڑا ضلع میں 40حلقوں کے لئے ریزرویشن اعلامیہ جاری کیاگیاتھا۔ کمٹہ تعلقہ کے مرجان اور منڈگوڈ تعلقہ کے اندور کی ضلع پنچایت حلقوں کی ریزرویشن میں کوئی تبدیلی نہیں ہوئی تھی ۔ 2016کے انتخابات کے وقت اترکنڑا ضلع  کے 39ضلع پنچایت حلقوں میں ترمیم کرتےہوئے 40حلقے بنائے گئے تھے۔ یلاپور تعلقہ میں کروتی کو نیا ضلع پنچایت حلقہ بنایاگیا تھا۔