کاروارایس پی دفتر سے تبادلہ کیے جانے پر ناراض خاتون اسٹاف نے ڈی جی پی کے دفتر میں مچائی چیخ وپکار۔ ملازمت سے کیا گیا معطل
کاروار 6/جولائی (ایس او نیوز)کاروار کے سپرنٹنڈنٹ آف پولیس کے دفتر میں گزشتہ 20سال سے خدمات انجام دے رہی ایک منجولا گوڈا نامی خاتون کا تبادلہ اس مرتبہ اڈپی ضلع میں کردیا گیا تو وہ خاتون اس قدر ناراض ہوگئیں کہ سیدھے بنگلور و میں ڈی جی پی کے دفتر میں پہنچ گئیں اور وہاں پر چیخ و پکار مچاتے ہوئے ہنگامہ کھڑا کردیا۔
بتایاجاتاہے کہ منجولا نے اپنا تبادلہ کیے جانے کے خلاف سخت الفاظ میں اعتراض جتایااور پوچھا کہ آپ لوگ میرا تبادلہ کس طرح کرسکتے ہو؟منجولا کے اس رویے کو دیکھتے ہوئے ڈی جی پی نے اس طرح کی بدسلوکی کرنے والی منجولا کے خلاف ضابطے کے مطابق کارروائی کرنے کا حکم جاری کیا۔ڈی جی پی دفتر سے حکم جاری ہوتے ہی منجولا کو اپنے عہدے سے معطل کردیاگیا ہے۔پولیس محکمے سے متعلقہ دیگر عملے کے اراکین اس بات پر تعجب کا اظہار کیا جارہا ہے کہ ایک اسٹاف کو گزشتہ دودہائیوں سے ہی تبادلے کے بغیر ایک مقام پر رہنے اور عہدے پر ترقی پانے کا موقع کیسے دیا گیا تھا۔