سرسی:15؍ جنوری (ایس اؤ نیوز) ودھان پریشد انتخابات میں کانگریس کا  مضبوط قلعہ مانے جانےو الے اترکنڑا ضلع میں پارٹی کے امیدوار کی شکست کے لئے کانگریس کارکنان ہی ذمہ دار ہیں، اس بات کا الزام  ودھان پریشد کے سابق رکن ایس ایل گھوٹنیکر نے   لگایا ہے۔

اخبارنویسوں سے بات کرتےہوئے گھوٹنیکر نےکہاکہ ضلع میں کانگریس کے دو گروپ ہیں ۔ ایک گروپ پارٹی کی مضبوطی و استحکام کے لئے دن رات کام کرتاہے تو دوسرا گروپ پارٹی امیدواروں کو ہرانےکےلئے کام کرتاہے متعلقہ گروپ سیاسی طورپر کسی کو بھی اوپراٹھنےکا موقع نہیں دیتا۔ انہوں نےکہاکہ ضلع کے عوام پچھلے کئی برسوں سے دیکھ رہے ہیں کہ دوسرے گروپ کی قیادت کون کررہاہے ۔اس گروپ لیڈر کے متعلق سبھی کو معلوم ہے، لیکن اُس گروپ کے خلاف کوئی کاروائی نہیں ہورہی ہے۔

گھوٹنیکر نے بتایا کہ مراٹھا طبقے کی ترقی کےلئے منظورہوئی امداد کا غلط استعمال کرنےوالے الزام کے پیچھے سیاسی سازش کار فرما ہے۔ اس سازش کے پیچھے سابق وزیر، قانون کی ڈگری میں گولڈ میڈل لینے والے اور بی جے پی ، جے ڈی ایس لیڈران ہونے کی بات کہی۔ گھوٹنیکر نے بتایا کہ  میرے خلاف جو بھی الزامات  عائد کئے گئے ہیں ان میں کوئی سچائی نہیں ہے۔ مجھ الزام لگانے والا این ایس جئیوجی ایک بلیک میلر ہے، اس کے خلاف ہی چک باؤنس کا معاملہ درج ہے۔ جیل کی ہواکھانےو الے کو سامنے رکھ کر جھوٹے الزامات  لگائے جارہےہیں۔ گھوٹنیکر نے چیلنج کیا کہ  اگر میرے خلاف کوئی دستاویز ہوتو پیش کرکے دکھائے۔ انہوں نے یہ بھی کہا کہ جب سے  میں نے آئندہ ودھان سبھا انتخابات میں ہلیال سے امیدوار ہونے کا اعلان کیا ہے اسی دن سے مجھے سیاسی طورپر ختم کرنےکی کوششیں جاری ہیں۔