کاروارکی رکن اسمبلی روپالی نائک بھی لوک آیوکتہ کو جائداد سے متعلق تفصیلات فراہم نہ کرنے والوں میں شامل
بنگلورو4/دسمبر (ایس او نیوز) ریاستی لوک آیوکتہ جسٹس وشوا ناتھ شیٹی کی طرف سے گورنر واجو بھائی والاکو ان منتخب عوامی نمائندوں کی فہرست پیش کردی گئی ہے جنہوں نے قانون کے مطابق اپنی جائداد سے متعلق سالانہ تفصیلات لوک آیوکتہ کو پیش نہیں کی ہے۔ اس فہرست میں کاروار۔انکولہ حلقے سے منتخب رکن اسمبلی روپالی نائک کا نام بھی شامل ہے۔
کرناٹکا لوک آیوکتہ قانون کے مطابق تمام عوامی نمائندوں کی طرف سے سال 2018/19کی تفصیلات یکم جولائی تک پیش کی جانی چاہیے تھی۔ مگر لوک آیوکتہ نے ریاستی گورنر کو جو رپورٹ دی ہے اس میں کہا گیا ہے کہ 15 اراکین اسمبلی اور 7اراکین کاونسل نے ابھی تک اپنی جائداد کی رپورٹ پیش نہیں کی
ہے۔اس ضمن میں بار بار نوٹس دینے کے باوجود ان منتخب عوامی نمائندوں نے اس پر توجہ نہیں دی ہے۔
رکن اسمبلی روپالی نائک کے قریبی ذرائع کا کہنا ہے کہ بنگلورو میں واقع ایم ایل اے دفتر سے وہاں پر موجود لوک آیوکتہ دفتر میں گزشتہ مہینے ہی رپورٹ داخل کی گئی ہے۔ چونکہ روپالی نائک اپنے حلقے میں سیلاب زدگان کی بازآبادکاری کے کام میں بہت زیادہ مشغول ہیں اس لئے مقررہ وقت پر رپورٹ جمع نہیں کی جاسکی تھی۔ لیکن گزشتہ مہینے میں رپورٹ داخل کی گئی اس کے باوجود رپورٹ موصول نہ ہونے کی شکایت لوک آیوکتہ نے جو گورنر سے کی ہے اس بارے میں تحقیق کی جائے گی۔
اس وقت روپالی نائک یلاپور ضمنی انتخاب کی تشہیری میں مہم میں لگی ہوئی ہیں، اس لئے اس رپوٹ کے تعلق سے کوئی رد عمل ظاہر کرنے کے لئے دستیاب نہیں ہوسکیں۔