کاروار:بچوں کے سامنے ہی شوہر نے بیوی کو چاقو گھونپ کر زخمی کردیا
کاروار 25/جون (ایس او نیوز) شیرواڈ ریلوے اسٹیشن کے پلیٹ فارم پرشراب کے نشے میں دھت ایک شخص نے تین چھوٹے چھوٹے بچوں کے سامنے ہی اپنی بیوی کو چاقو گھونپ کر زخمی کردیا۔
بتایاجاتا ہے کہ اتر پردیش کے اکبر پور کا رہنے والا ونو عرف شکیل احمد خان، اس کی بیوی لیلا وتی سونو خان(25سال) اور بچے ٹرین میں بھیک مانگ کر زندگی بسر کرتے ہیں۔ سونواور لیلاوتی دونوں شراب پینے کے عادی ہیں اور نشے کی حالت میں وہ اکثر لڑائی جھگڑا او رمارپیٹ کرتے رہتے ہیں۔مڈگاؤں سے کاروار کی طرف میاں بیوی اپنے بچوں کے ساتھ روانہ ہوئے اور جب وہ لوگ شیرواڈ ریلوے پلیٹ فارم پر اترے تو دونوں بری طرح نشے میں دھت تھے۔ ٹرین سے اترنے کے ساتھ ہی ان دونوں نے جھگڑنا شروع کیا۔اور پھر دیکھتے ہی دیکھتے سونو نے اپنی بیوی کی پیٹھ میں چاقو گھونپ دیا۔ مقامی افراد نے پولیس کو اطلاع دی تو اس نے موقع پر پہنچ کر لیلاوتی کو ضلع اسپتال میں داخل کیااور سونو کو گرفتار کرکے معاملے کی تحقیقات کی جارہی ہے۔