کاروار ،15؍ جون (ایس او نیوز) سٹی میونسپل کاونسل کی طرف سے شہر کی سڑکوں کے نام  والے بورڈس کو کنڑا اوردیوناگری رسم الخط  کے ساتھ  کونکنی زبان میں لکھے جانے کے بعد کنڑا حامیوں نے یہاں ہندی ، مراٹھی اور کونکنی کا تنازع کھڑا کیا ہے ۔ 
    
اس سے پہلے ان بورڈس پر ہندی رسم الخط میں سڑک کا نام دیکھ کر اسے مرہٹی زبان سمجھنے اور اس پر میونسپالٹی کے افسران کو دھمکانے کی نیوز سامنے آئی تھی ۔ اس کے بعد کنڑا ساہتیہ پریشد کے عہدیداران اور کنڑا حامیوں نے سوموار کے دن ضلع ڈپٹی کمشنر کو میمورنڈم دیتے ہوئے مطالبہ کیا تھا کہ تین دن کے اندر دیوناگری رسم الخط والے بورڈ ہٹائے جائیں ۔ اسی دوران کنڑا رکھشنا ویدیکے (پروین شیٹی گروپ) منگل کے دن خود ہی آگے بڑھ کر ایسے کچھ بورڈس پر کالا رنگ پوتنے کی کارروائی کی  جس کے دوران سٹی میونسپل کاونسل اور میونسپل کمشنر کے خلاف نعرے بازی بھی کی گئی ۔ 
    
بتایا جاتا ہے کہ اس سے قبل کاروار سٹی میونسپل کاونسل کے حدود میں  وارڈس اور سڑکوں کے نام  کنڑا اور انگریزی زبان میں لکھے جاتے تھے ۔ اس مرتبہ میونسپالٹی کے یہ نام کنڑا کے ساتھ کونکنی زبان میں بھی لکھنے کا فیصلہ کیا اور نئے بورڈس مختلف مقامات پر نصب کیے گئے جس پر شہر میں یہ نیا تنازع کھڑا ہوگیا ہے ۔