کیااترکنڑا میں کورونا کی تیسری لہر کی شروعات ہوچکی ہے؟:ایکٹیو معاملات میں مسلسل اضافہ ؛ ہوم آئسولیشن کی تعداد میں بھی بڑھوتری
کاروار:2؍اگست (ایس اؤ نیوز)اترکنڑا ضلع میں دن بدن کورونا مریضوں میں اضافہ ہونے سے پھر ایک بار عوام میں دہشت پیدا ہورہی ہے۔پچھلے تین دنوں سے متاثرین کی تعداد میں لگاتار اضافہ ہورہاہے۔ ریاست کے 8اضلاع میں کورونا کے متاثرین میں اضافہ دیکھا جارہاہے،اترکنڑا ضلع بھی اسی راستے پر گامزن ہے۔حال ہی میں ٹرانسپورٹ محکمہ کی بسوں اور پرائیویٹ سواریوں کی نقل وحمل شروع ہوئی تھی اور سیاحتی مراکز پر بھی تھوڑی بہت ہلچل نظر آرہی ہے، اب سوال یہ پیدا ہورہاہے کہ کیا اس طرح کی آزادی سے دیگر اضلاع کے مریضوں سے ضلعی عوام بھی متاثر ہونگے ؟۔
اترکنڑا ضلع میں سنیچر کو 75لوگ کورونا سے متاثرہوئے ہیں ۔ پچھلے تین دنوں سے یہ تعداد 72تھی جب کہ جمعہ کوپوزیٹیو آنے والوں کی تعداد 50سے زائد تھی تو بڑھتے بڑھتے 75تک پہنچی ہے۔ یعنی دن بدن متاثرین کی تعداد میں اضافہ ہورہاہے اس کے علاوہ پچھلے تین چار دنوں سے اموات کی تعداد بھی دو کے قریب ہی ہے۔ اسی طرح ہوم آئسولیشن میں رہنے والوں کی تعداد بھی زیادہ ہے تو ایکٹیو کیس بھی بڑھ رہے ہیں۔ ان سب وجوہات کی بنا پر سوال پیدا ہورہاہےکہ کیا کورونا کی تیسری لہر شروع ہوچکی ہے؟
کاروار میں 10،انکولہ میں 14،کمٹہ میں 16، ہوناور میں 17،بھٹکل میں 7،سرسی میں 6،سداپور میں 3، یلاپور اور جوئیڈا میں ایک ایک ایکٹیو معاملہ درج ہواہے۔ جہاں ایکٹیو کیسوں میں اضافہ ہورہاہے وہیں مرنے والوں کی تعداد میں بڑھوتری عوام میں دہشت پیدا کررہی ہے ۔ ہوناور میں دولوگوں کی موت ہونے سے مرنے والوں کی کل تعداد 730ہوگئی ہے۔