کاروار : آئندہ ریوینیو انسپکٹر اور ولیج اکاونٹنٹ کو اپنا مقام چھوڑنے کی اجازت نہیں رہے گی
کاروار،28؍ ستمبر (ایس او نیوز) ریاستی حکومت میں محکمہ مالگزاری (ریوینیو) کے انڈر سیکریٹری ہریش کی طرف سے ضلع ڈپٹی کمشنروں کو جاری کی گئی ہدایت کے مطابق آئندہ ریوینیو انسپکٹر اور ولیج اکاونٹنٹ کو اپنے مقام تعینات کے سرکل سے باہر جانے کی اجازت نہیں رہے گی اور اگر اس حکم کی خلاف ورزی کی گئی تو پھر ان کے خلاف تادیبی کارروائی ہوگی۔
گرام پنچایت سطح پر ولیج اکاونٹنٹس اور ہوبلی سطح پر ریوینیو انسپکٹرس اور نائب تحصیلداروں کو تعینات کیا جاتا ہے ۔ مگر ولیج اکاونٹنٹس اور ریوینیو انسپکٹرس اپنے مقام پر موجود نہ رہنے کی وجہ سے عوام کو دفتری اوقات میں اپنے مسائل حل کرنے میں دشواری پیش آتی ہے ۔ اور دستاویزی ضروریات پورے کرنے کے لئے عوام کو بار بار دفتروں کے چکر کاٹنے پڑتے ہیں ۔ اس پس منظر میں حکومت کی جانب سے ان افسران کو لازمی طور پر اپنے مقام پر موجود رہنے کے تاکیدی احکام جاری کیے گئے ہیں۔
تحصیلداروں کو ہدایت دی گئی ہے کہ اس ضمن میں وہ جائزہ لیتے رہیں اور کسی کے تعلق سے شکایت موصول ہونے پر ضلع ڈپٹی کمشنر کو اپنی رپورٹ کے ساتھ متعلقہ افسر کے خلاف تادیبی کارروائی کے لئے سفارش روانہ کریں ۔ اس رپورٹ کا جائزہ لینے کے بعد اگر ولیج اکاونٹنٹ یا ریوینیو انسپکٹر اپنے مقام پر موجود نہ رہنے کی وجہ سے عوام کو دشواری پیش آنے کی بات سچ ثابت ہوتی ہے تو ڈپٹی کمشنر کی جانب سے متعلقہ عملہ کے خلاف ضابطہ کے مطابق کارروائی کی جائے گی۔
