کاروار:24؍نومبر(ایس اؤ نیوز) ڈگری کالجوں کی شروعات کے لئے فائنل ائیر کے طلبا و طالبات کو کورونا وائرس کی جانچ لازمی قرار دے کر متعلقہ کالجوں میں جانچ کرنےکے بعد ضلع بھر میں 13طلبا ، 7ڈگری کالج لکچررس اور ایک غیر تدریسی عملے کو کورونا وائرس پوزیٹیو رپورٹ موصول ہوئی ہے، رپورٹس پوزیٹیو آنے سے کالج شروعات کے لئے قابل تشویش مانا جارہاہے۔

ریاستی حکومت نے ڈگری کالج میں فائنل ائیر کے طلبا و طالبات کو آف لائن کلاسس شروع کرنے کا حکم جاری کرتےہوئے کالج حاضری کے لئے طلبا ، لکچررس اور غیر تدریسی عملے کی کووڈ-19جانچ لازمی قرار دیا تھا۔ جس کے مطابق متعلقہ مقامات کے کالجوں میں ان سبھی کے تھوک کے سیمپل لئے جانے کے بعداس کا پتہ چلا ہے۔

ضلع میں فائنل ائیر کے کل 5204طلبا اور 1044تدریسی و غیر تدریسی عملے کے سیمپل لئے گئے تھے۔ جن میں 13طلبا ، 7لکچررس اور ایک عملے کی رپورٹ پوزیٹیو آئی ہے۔ گرچہ 6248افراد میں سے 21افراد کی رپورٹ پوزیٹیو آنا کوئی قابل ذکر تو نہیں ہے لیکن ایک عرصے کے بعد ڈگری کالجوں کی شروعات کے موقع پر طلبا ، لکچررس اور عملے کی رپورٹ پوزیٹیو آنے سے  تشویش ہونے کی بات کہی جارہی ہے۔

ضلع میں کل 25ہزار طلبا فائنل ائیر میں زیر تعلیم ہونے کا اندازا لگایا گیا ہے۔ جن میں سے فی الحال  صرف 6ہزار طلبا ہی آف لائن کلاسس میں شریک ہورہے ہیں، کیونکہ سبھی طلبا کی رپورٹ ابھی تک نہیں ملنے سے حاضری میں کمی بتائی جارہی ہے۔

ضلع میں کورونا معاملات میں اضافہ :اترکنڑا ضلع میں پیر کو کل 37کورونا پوزیٹیو رپورٹ موصول ہونے سے کورونا پوزیٹیو کی کل  تعداد 13649ہوگئی ہے۔ گزشتہ 24گھنٹوں میں کاروار میں کورونا سے ایک کی موت ہو ئی ہے، اب تک کورونا سے مرنے والوں کی ضلع میں تعداد 175ہوگئی ہے۔ اسی طرح پیر کو ضلع  میں 18لوگ کورونا سے صحت یاب ہوئے ہیں۔ ضلع میں  ابھی تک کل 1231لوگ صحت یاب ہوکر گھر لوٹے ہیں۔  ضلع میں 243معاملات زیر علاج ہیں تو 103اسپتال میں تو 140ہوم آئسولیشن میں زیر علاج ہیں۔