کاروار: لالچ میں مبتلا ہو کر عوامی نمائندوں سے سوال پوچھنے کے حق سے دستبردار نہ ہونے عوام سے ضلعی منصف کی ہدایت
کاروار:25؍جنوری (ایس او نیوز) انتخابات میں حرص وطمع کا شکار ہوکر منتخب عوامی نمائندوں سے سوال پوچھنے کا اپنے حق سے دستبردار نہ ہونے ضلعی منصف ٹی جی شیو شنکر گوڈا نے رائے دہندگان کو صلاح دی۔ وہ یہاں بھارت الیکشن کمیشن ،اترکنڑا ضلع انتظامیہ ، کرناٹکا حقوق انسانی کمیشن اور ضلع قانونی خدمات بورڈ کے اشتراک سے جمعہ 25جنوری کو کاروار کے ضلع رنگ مندر میں منعقدہ قومی یوم ِ رائے دہندگان اور عالمی یوم انساننی حقوق کاافتتاح کرنے کے بعد خطاب کررہے تھے۔
فاضل جج نے ووٹرس کو بیدار کرتے ہوئے کہاکہ الیکشن کے دوران امیدوار بہت سارے وعدے بھروسے کرتے ہوئے لالچ دیتے ہیں، اگر ووٹر ان کے جال میں پھنس گئے اور ان کے لالچ میں مبتلا ہوئے تو آئندہ اقتدار اور اختیار کے پانچ برسوں میں آپ ترقی کے متعلق سوال کرنے کا اپنا حق کھو دیں گے۔ جو بھی عوامی نمائندے لالچ ، حرص کی بنیاد پر جیت حاصل کرتے ہیں وہ کبھی عوامی حقوق کی ذمہ داریوں کو ادا نہیں کرتے۔ بھارت کے ہر ووٹر کی ذمہ داری ہے کہ وہ عوامی تبدیلی کے لئے انتخابات میں حصہ لے ۔انہوں نے کہا کہ صرف اور صرف ملک کی ترقی کی خاطر بے خوف و نڈرہوکر انتخابات میں شریک ہونے کی ضرورت ہے، جس کے لئے ملک کے نوجوانوں کو تیار ہونے کی ضرورت ہے۔ انہوں نےکہاکہ اس دوران آپسی عزت کو باقی رکھتے ہوئے انسانی اقدار پر عمل کریں اور ہرایک کے حقوق کا احترام کریں ۔ انہوں نے اپیل کی کہ کسی بھی حال میں قانون کی خلاف ورزی نہ ہونے پائے۔
پروگرام کی صدارت کرتے ہوئے اترکنڑا ضلع ڈپٹی کمشنر ایس ایس نکول نے انتخابات کے دوران سوشیل میڈیا پر شائع ہونے والی خبریں ، پوسٹ ہونے والی موافق و مخالف خبروں کے متعلق نوجوانوں کو بیدار رہنے کی تلقین کی اور کہا کہ اس طرح ایک صاف اور شفاف انتخابات کے انعقاد میں تعاون کریں۔ ڈپٹی کمشنر نے ملک میں جاری ای وی ایم انتخابی نظام کو بہت ہی ایماندارانہ اور شفاف ہونےکی بات کہتے ہوئے افواہوں پر توجہ نہ دینے کی بات کہی۔ الیکشن میں شریک ہوتے ہوئے ایک مضبوط ومستحکم بھارت کی تشکیل کرنے میں ساتھ دینے کی بھی اپیل کی۔
سنئیر سول جج اور ضلع قانونی خدمات بورڈ کے ممبر سکریٹری ٹی گوندیا نے خصوصی مقالہ پیش کیا۔ سرکاری آرٹس اینڈ سائنس کالج کی پرنسپال کلپنا کیروڈیکر نے حلف دلوایا۔کاروار اے سی ابھیجن نے استقبال کیا، تحصیلدار آر وی کٹی نے شکریہ اداکیا۔ ضلع ایس پی ونایک پاٹل اور ایڈیشنل ڈی سی ڈاکٹر سریش ایٹنال موجود تھے۔
پروگرام میں بہترین بلاک آفیسر اور سویپ کی جانب سےانتخابی نظام کے متعلق منعقدہ مختلف مقابلہ میں جیت حاصل کرنے والوں کو انعامات سے نوازاگیا۔ پروگرام سے قبل ضلع ڈی سی دفتر سے ضلع رنگ مندر تک رائے دہندگان بیداری ریلی نکالی گئی جس میں قریب ایک ہزار طلبا وطالبات شریک تھے۔