کاروار ،4؍ مئی (ایس او نیوز) شہر کے نندن گدّا میں دل کو چھلنی کرنے والا ایک منظر دیکھنے کو ملا جس میں 4 مئی کو جس نوجوان کی شادی طے تھی وہ کورونا کی وجہ سے 3 مئی کو چتا پر جلائے جانے کے لئے شمشان پہنچ گیا۔

    موصولہ رپورٹ کے مطابق یہ نوجوان پونہ کی ایک کمپنی میں ملازم تھا۔ چونکہ شادی کی تاریخ طے ہوگئی تھی اس لئے تیاریوں کے لئے وہ ایک مہینے قبل اپنے گھر لوٹ آیا تھا۔ مگر پچھلے کچھ دنوں سے اس کی طبیعت خراب چل رہی تھی۔ ڈاکٹروں نے کورونا کا شک جتاتے ہوئے ٹیسٹ کرنے کا مشورہ دیا، چونکہ شادی کے دن قریب تھے اس لئے اس نے گھر پر ہی رہ کر تشخیص کے بغیر ہی علاج کرنے کو ترجیح دی۔

    کل جب سانس کی تکلیف ناقابل برداشت ہوگئی تو اسے ضلع اسپتال لے جایا گیا جہاں جانچ کرنے پر کورونا پوزیٹیو ہونے کا معاملہ کنفرم ہوگیا۔ اسی دوران اس کو کووڈ سینٹر میں داخل کرکے علاج کرنے کی کوشش کی گئی مگر معاملہ سنگین صورت اختیار کرگیا اور اس نوجوان نے اسپتال کے بستر پر دم توڑ دیا۔