کاروار 26/اکتوبر(ایس او نیوز) ضلع شمالی کینرا میں پہلی مرتبہ کسی خاتون کی ادارت میں شائع ہونے والے کنڑا روزنامے ’نوڈی جینو‘ کا اجراء وزیر برائے بہبودیئ اطفال و خواتین اور ضلع انچارج ششی کلا جولّے اور کاروار۔انکولہ کی رکن اسمبلی روپالی نائک کے ہاتھوں عمل میں آیا۔

 شہر میں ڈپٹی کمشنر دفتر کے احاطے میں واقع ضلع انچارج وزیر کے دفتر میں رسم اجراء کی خوبصورت تقریب انجام دی گئی۔ اس موقع پروزیر ششی کلا جولّے نے روز نامے کی ترقی اور مقبولیت کے لئے نیک تمنّاؤں کا اظہار کیا۔یہاں اس بات کا تذکرہ ضروری ہے کہ ’نوڈی جینو‘ اخبارصحافتی دنیا میں اپنے پچاس سال پورے  کرنے جارہا ہے اور یہ ضلع کا ایک قدیم ترین اخبار ہے۔ گزشتہ 49برسوں سے یہ اخبار اپنے قارئین کا ایک مخصوص حلقہ رکھتا ہے۔ سب سے پہلے 26جنوری 1970 میں‘انکولہ تعلقہ کے بھاوی کیری کے رہنے والے صحافی بی ہونپّا نے اسے ’نوڈی جینو ماہنامہ کی شکل میں شروع کیا تھا۔ پھر یہ کچھ برسوں تک پندرہ روزہ اخبار کی صورت میں شائع ہوتا رہا۔ گزشتہ 33برسوں سے یہ ہفتہ وار کے طور پرباقاعدگی سے شائع ہورہا ہے۔اس اخبارکی خدمات کا اعتراف کرتے ہوئے کرناٹکا مادھیما اکیڈیمی کی طرف سے ایوارڈ بھی تفویض کیا گیا ہے۔

اب جبکہ یہ اخبار اپنے 50ویں سال میں قدم رکھ رہا ہے تو بی ہونپّا نے اس اخبار کی مزید ترقی اور قارئین کے وسیع حلقے تک اسے پہنچانے کی نیت سے اخبار کو روزنامے میں بدلنے کے ساتھ ہی اس کی ادارت کی ذمہ داری ایک خاتون مدیر محترمہ لاونیا اے کے ہاتھوں میں سونپی ہے۔

 ’نوڈی جینو‘کنڑا روزنامے کی رسم اجراء کے موقع پر ہلیال حلقے کے سابق رکن اسمبلی سنیل ہیگڈے، ایڈوکیٹ ناگراج نائک، بی جے پی کے ضلع ترجمان راجیش نائک، بی جے پی کاروار تعلقہ صدر منوج بھٹ، راجیندرا نائک، نینا نیلاور کے علاوہ دیگر معززین شہر موجود تھے۔