کاروار: 4 مارچ سے شروع ہورہے ہیں پی یوسی دوم کے امتحانات ؛ دور دراز کے طلبا کو ہال ٹکٹ دکھا کر بس پر سفرکرنے کی سہولت
کاروار:20؍فروری(ایس اؤ نیوز) 4 مارچ سے شروع ہونے والی پی یوسی سال دوم کے سالانہ امتحانات میں امسال طلبا کو سہولت مہیا کرتے ہوئے 40صفحات کا جوابی پرچہ دیا جائے گا۔ اس سے تینوں شعبوں آرٹس، سائنس اور کامرس کے طلبا کے لئے سہولت ہوگی۔اس بات کی جانکاری ضلع پی یو تعلیمات عامہ کے ڈائرکٹر ایس این ہیگڈے نے دی۔ وہ یہاں محکمہ نشر و اشاعت اوررابطہ عامہ کی طرف سےمنعقدہ ڈائرکٹ فون اِن اور گفتگو پروگرام میں اخبارنویسوں سے بات کر رہے تھے۔ انہوں نے بتایا کہ رواں سال کے سالانہ امتحانات میں طلبا کومعیاری کاغذ والے 40صفحات والے جوابی پرچوں کے ہر صفحے پر 4-5سطر زائد ہونگے۔ انہوں نے دیہی علاقوں سے سفر کرنے والے طلبا کو راحت دیتے ہوئے کہاکہ امتحانات کے دوران بس پاس کی مدت ختم ہونے یا روٹ تبدیلی کولے کر طلبا پریشان نہ ہوں۔ ریاستی وزیر تعلیم نے باقاعدہ حکم دیا ہے کہ طلبا اپنا ہال ٹکٹ کنڈکٹر کو بتاکر سفر کرسکتے ہیں، طلبا اس سہولت سےاستفادہ کرسکتے ہیں۔ انہوں نے کہا کہ طلبا وقت سے پہلے امتحانی مراکز پہنچیں اور ہال ٹکٹ کی زیرا کس کاپی اپنے پاس رکھیں تاکہ کسی طرح کی کوئی پریشانی نہ ہو۔
ڈی ڈی پی یو نے بتایا کہ ضلع اُترکنڑا میں 30/امتحانی مراکز ہیں۔ ہر ایک مرکز میں سی سی ٹی وی کیمرے نصب کئے گئے ہیں، جس کے ہوتے کسی بھی طرح کی نقل نویسی کا موقع نہیں ہو گااور ہر امتحانی کمرےکی دیوار پر وقت بتانے کےلئے گھڑی اور پینے کے پانی کا انتظام رہے گا۔ سرسی ماری کامبا سرکاری پی یو کالج پرنسپال بال چندر بھٹ نے بتایا کہ سرسی میں ماری کامبا کا جاترا اور امتحانات بیک وقت شروع ہورہےہیں، والدین اور سرپرستوں کو چاہئے کہ وہ اپنے بچوں کو وقت پر امتحانی مراکز پہنچانےکی طرف خاص توجہ دیں۔ کمٹہ سرکاری پی یو کالج پرنسپال ستیش نائک نے بتایا کہ امتحانات کے دور میں طلبا اپنی صحت کی طرف خاص توجہ دیں۔