اترکنڑا ضلع ودھان پریشد انتخابات: کانگریس سے بھیمنانائک اور بی جے پی سے گنپتی الویکر نے داخل کی پرچہ نامزدگی
کاروار:23؍نومبر(ایس اؤ نیوز) اترکنڑا ضلع میں مقامی عوامی اداروں کے نمائندوں سے ہونے والے ودھان پریشد انتخابات کےلئے بروز منگل 23نومبر 2021 کو کانگریس کے بھیمنا نائک اور بی جے پی کے گنپتی الویکر نے بطور پارٹی امیدوار اپنی پرچہ نامزدگی داخل کی ۔
کانگریس پارٹی کی جانب سے اترکنڑا ضلع کانگریس صدر بھیمنا نائک نے پارٹی لیڈران مدھو بنگارپا، ستیش سئیل ، شاردا شٹی اور منکال وئیدیا کے ساتھ ڈی سی دفتر پہنچ کر اپنا پرچہ نامزدگی داخل کیا۔ ڈی سی دفتر پہنچنے سے پہلے مترا سماج سے پیدل یاترا نکالی گئی تھی جس میں ہلیال کے رکن اسمبلی آر وی دیش پانڈے اور ودھان پریشد کے ممبر ایس ایل گھوٹنیکر سمیت کئی لیڈران موجود تھے۔
اسی طرح بی جے پی کی طرف سے ماہی گیر لیڈر گنپتی الویکر نے کاروار انکولہ کی رکن اسمبلی روپالی نائک، کاروار میونسپالٹی صدر ڈاکٹر نتین پکلے ، نائب صدر پرکاش نائک، ضلعی صدر وینکٹیش نایک، نائب صدر گووند نائک کے ساتھ ڈی سی دفتر پہنچ کر پرچہ نامزدگی داخل کیا۔ وہ کاروار کے گنپتی مندر میں خصوصی پوجا کرنے کے بعد پیدل یاترا کے ذریعے ڈی سی دفترپہنچے تھے۔ گنپتی الویکر گذشتہ مرتبہ بھی ودھان پریشد کا الیکشن لڑا تھا لیکن ایس ایل گھوٹنیکر کے خلاف شکست کھا گئے تھے۔ وہ دوسری مرتبہ ودھان پریشد انتخابات میں اپنی قسمت آزما رہے ہیں۔
