کاروار: الگیری شہری ہوائی اڈہ : بازآبادکاری کے لئے بقیہ فنڈ طلب کیا گیا ہے - کوٹا سرینواس پجاری کا بیان
کاروار،17؍اگست (ایس او نیوز) پولیس پریڈ گراونڈ میں جشن آزادی کی تقریب میں حصہ لینے کے بعد ضلع انچارج وزیر کوٹا سرینواس پجاری نے اخباری نمائندوں سے مخاطب ہو کر کہا کہ انکولہ کے الگیری میں مجوزہ شہری ہوائی اڈہ کی تعمیر کے لئے تحویل اراضی کا کام جاری ہے اور بے گھر ہونے والوں کی بازآباد کاری کے لئے بقایا فنڈ فوراً جاری کرنے کے لئے حکومت سے اپیل کی گئی ہے۔
انہوں نے کہا کہ رن وے اور ٹرمینل کے لئے اضافی زمین تحویل میں لینے کی کارروائی شروع کی گئی ہے ۔ یہ شہری ہوائی اڈہ عوام کے استعمال کے لئے پیش کرنے کے لئے حکومت کی طرف سے اقدامات کیے جا رہے ہیں۔
ضلع میں چٹانیں کھسکنے کے واقعات پر تبصرہ کرتے ہوئے وزیر موصوف نے کہا کہ جیولوجیکل سروے آف انڈیا ٹیم ضلع کے مختلف مقامات کا معائنہ کر رہی ہے ۔ دو ایک دنوں میں ان کا کام پورا ہوجائے گا ۔ بار بار جہاں زمین کھسکنے کے واقعات پیش آ رہے ہیں ایسی بعض جگہوں سے وہاں کے مکینوں کو دوسرے مقامات پر منتقل کرنے کے بارے میں بھی غور کیا جا رہا ہے۔