غیر قانونی طور پر گوا سے80 لاکھ روپے مالیت کی غیر ملکی کرنسی لانے والے دو افراد کاروار بس اسٹانڈپرگرفتار
کاروار 13/ نومبر (ایس او نیوز) کارواربس اسٹانڈ پر ٹاؤن پولیس اسٹیشن کے افسران نے غیر قانونی طور پر گوا سے غیرملکی کرنسی لانے والے دو افراد کو گرفتار کرلیا ہے۔
پولیس کے بیان کے مطابق ایک مصدقہ اطلاع پر کارروائی کرتے ہوئے بغیر کسی قانونی دستاویز یا ثبوت کے اپنے پاس غیر ملکی کرنسی رکھنے والے جن دو ملزمین کو گرفتار کیا ہے ان کے نام عبدالسراج اور نذیر ہیں، جو کہ بھٹکل کے رہنے والے ہیں۔معلوم ہوا ہے کہ گوا کے مڈگاؤں سے جب یہ دونوں بس میں سفر پر نکلے تھے تو کسی مخبر نے پولیس کو اس کی اطلاع دی تھی۔
پولیس کے بیان کے مطابق ملزمین کے پاس جو غیر ملکی کرنسی برآمد ہوئی ہے اس میں یو کے پاؤنڈز، امریکی ڈالرزاور افریقی ممالک کی کرنسی شامل ہے جس کی مجموعی مالیت کا اندازہ 80لاکھ روپے لگایا گیا ہے۔پولیس کا کہنا ہے کہ پوچھ تاچھ کے دوران ملزمین کے بارے میں پتہ چلا ہے کہ یہ دونوں پچھلے کئی برسوں سے غیر ملکی کرنسی اسمگل کرنے میں مصروف رہے ہیں۔
بس اسٹانڈ پر چھاپہ ماری کی یہ کارروائی میں ڈی وائی ایس پی شنکر ماریہال، سی پی آئی سنتوش شیٹی، پی ایس آئی سنتوش کُرماکی قیادت میں انجام دی گئی۔
