کاروار:4؍اپریل (ایس او نیوز) لوک سبھا انتخابات کے لئے کانگریس۔جے ڈی ایس کے مشترکہ اُمیدوار آنند اسنوٹیکر  کی انتخابی ریلی میں شریک ہونے اور پرچہ نامزدگی داخل کرنے کاروار  پہنچے کرناٹک کے وزیراعلیٰ کماراسوامی نے  سخت حیرت کا اظہار کرتے ہوئے کہا کہ اُن کی کار کو قریب 13 چیک پوسٹوں پر روکا گیا اور کار کی تلاشی لی گئی۔ میں ایک وزیراعلیٰ ہوں اور میرے ساتھ اس طرح کا سلوک کیا جارہا ہے اور میری عزت اور شخصیت پر حملہ کیا جارہا ہے، ایسی گھٹیا سیاست میں نے اس سےپہلے کبھی نہیں دیکھی ہے۔

اخبارنویسوں سے گفتگوکرتے ہوئے کماراسوامی نے کہا کہ گوکرن میں جب کھانا کھاکر نکلا تو دو جگہوں پر میری تلاشی لی گئی، بار بار کی تلاشی کو دیکھتے ہوئے جب میں نے وجہ دریافت کی تو مجھے بتایا گیا کہ  الیکشن کمیشن کا ایسا حکم ہے۔

کماراسوامی نے   ان کے فرزند اور منڈیا کے اُمیدوارنکھیل کے قیام کردہ ہوٹل کے کمرے پر بھی انکم ٹیکس آفسران کی  طرف سے چھاپہ مارنے کی اطلاع دیتے ہوئے  بتایا کہ  انکم ٹیکس کے اہلکاروں کو نکھیل کے ہوٹل میں بھی کچھ نہیں ملا۔ کماراسوامی نے  کہا کہ آفسران ان کی پارٹی کے اُمیدواروں کے گھروں پر چھاپہ ماررہے ہیں اور اُنہیں کچھ نہیں مل رہا ہے، کماراسوامی نے آفسران کو مخاطب کرتے ہوئے کہا کہ   اگر اُنہیں چھاپے  مارنے ہی ہیں تو بی جے پی لیڈروں اور بی جے پی اُمیدواروں کے گھروں پر جاکر چھاپے مارے، اُن کے اُمیدوار بے شمار پیسے لُٹارہے ہیں سینکڑوں سواریاں اُن کے پیچھے جارہی ہیں، ہمت ہے تو اُن سواریوں کو روک کر تلاشی لیں، کماراسوامی نے آگے کہا کہ  اُن کی تلاشی کوئی نہیں لے رہا ہے۔

آئی ٹی آفسران خود لُٹیرے ہیں: کماراسوامی نے کہا کہ انکم ٹیکس کے آفسران خود سب سے بڑے لُٹیرے ہیں جن کے گھر سے سی بی آئی کے چھاپے میں 1.50 کروڑ روپئے کی رقم برآمد ہوئی  ہے۔ کماراسوامی کے مطابق بدھ کو آئی ٹی آفسران  15 لاکھ روپیہ رشوت لیتے ہوئے رنگے ہاتھوں پکڑے بھی گئے ہیں، یہی لُٹیرے اُمیدواروں اور عوام کو خواہ مخواہ پریشان کررہے ہیں۔