کرناٹک اردو اکیڈمی کی جانب سے اردو کے طلبہ کی حوصلہ افزائی کرنے کا فیصلہ؛ اُردو میں 80 فیصد یا اس سے زائد مارکس لینے والے توجہ دیں
بنگلورو،23؍اگست (ایس او نیوز) کرناٹک میں دسویں اور بارہویں جماعت کے امتحانات میں اردو مضمون میں امتیازی نمبرات حاصل کرنے والے طلباء و طالبات کی حوصلہ افزائی کے لئے انہیں نقد رقم دینے کا اعلان کیا گیا ہے۔ ساحل آن لائن سے گفتگو کرتے ہوئے کرناٹک اردو اکیڈمی کی رجسٹرار عائشہ فردوس نے کہا کہ 2020 کے سالانہ امتحانات میں اردو مضمون میں 80 فیصد سے زائد مارکس حاصل کرنے والے طلبہ کو نقد رقم بطور انعام دی جائے گی۔ ایس ایس ایل سی کے طلباء کو 2 ہزار روپئے جبکہ پی یو سی دوم کے طلباء کو 3 ہزار روپئے کی رقم انعام کے طور پر دی جائیگی۔ انہوں نے کہا کہ اس سلسلہ میں تعلیمی اداروں کے ذریعہ فہرست حاصل کی جارہی ہے۔ عائشہ فردوس نے کہا کہ اردو میں ایم اے کرنے والے طلبہ کو بھی اسکالرشپ دینے کا کرناٹک اردو اکیڈمی نے فیصلہ لیا ہے۔ انہوں نے بتایا کہ ایک سال کیلئے ایم اے اردو کے فی طالب علم کو 25 ہزار روپئے کی اسکالرشپ دینے کا اردو اکیڈمی نے منصوبہ بنایا ہے۔
عائشہ فردوس نے ریاست کے اردو داں طبقہ سے اپیل کی ہے کہ وہ اپنے بچوں کو اردو اسکولوں میں داخل کروائیں۔ اگر انگریزی یا کنڑا میڈیم اسکولوں میں طلبہ زیرتعلیم ہیں تو وہ اردو مضمون اختیار کریں۔ اگر کالج میں اردو مضمون موجود نہ ہو تو اس کیلئے والدین اور مقامی اردو تنظیمیں کالج کی انتظامیہ سے رجوع ہوکر اردو مضمون رائج کرنے کا مطالبہ کریں۔ عائشہ فردوس نے بتایا کہ انگریزی اور کنڑا ہائی اسکولوں میں اردو تیسری زبان کی حیثیت سے پڑھانے کی گنجائش موجود ہے۔ انہوں نے کہا کہ اردو تعلیم کو فروغ دینے کی ہر سطح پر کوششیں ہونی چاہئے۔ اردو تنظیمیں اردو زبان کی اہمیت اور ضرورت سے والدین کو آگاہ کریں۔ سماج میں اردو تہذیب، اردو زبان و ادب کے سلسلے میں بیداری پیدا کریں۔