ریاست میں عنقریب 272 ڈجیٹل لائبریریوں کا قیام لاکھوں عام لوگوں اور طلبہ کو رکنیت، پلیٹ فارم سی ای ٹی، نیٹ کی تیاری میں بھی کار آمد
بنگلورو،24؍اپریل (ایس او نیوز) کرناٹک میں بہت جلد 272 ڈجیٹل لائبریریوں کا قیام عمل میں آئے گا۔ ریاست کے 30 اضلاع، 26 شہروں اور 216 تعلقہ جات میں یہ لائبریریاں قائم ہوں گی۔ اس کے ذریعہ ارکان کی ویب سائیٹ اور ایپ کے ذریعہ کتابوں اور دیگر تعلیمی اور امتحانی مواد تک رسائی ہوگی۔ محکمہ برائے پبلک لائبریریزکی جانب سے رکویسٹ فار پرپوتزل (آر ایف پی) میں لائبریریوں کے لئے 1,088 اینڈ رائیڈ ٹیبلیٹس اور 544 ڈیسک ٹاپ کمپیوٹرز سمیت ہارڈ ویر کی ضرورت ہے۔ محکمہ کو پہلے ہی 12مارچ کو تکنیکی بولیاں مل چکی ہیں۔ انتخابی ضابطہ اخلاق ختم ہونے کے بعد تجارتی بولیوں کو کھولا جائے گا۔ محکمہ برائے پبلک لائبریریز کے ڈائرکٹر ستیش کمار ایو ہوسمنی نے بتایا کہ اس پلیٹ فارم پر عوامی لائبریریوں کے 25لاکھ ارکان کے علاوہ سرکاری ہائی اسکولوں اور پری یونیورسٹی کالجوں کے 10 لاکھ طلبہ بھی ہوں گے۔ انہوں نے کہا ’’ تجرباتی طور پر محکمہ ہاویری، چامراج نگر اور ٹمکور اضلاع میں بھی ایسے ہی پلیٹ فارم قائم کرے گا۔ بولیوں کو بہت جلد کھولا جائے گا۔ معاہدہ پر دستخط کے بعد ان کے پوری طرح کام کرنے کے لئے 6ماہ کی مدت درکار ہوگی۔‘‘ کلاؤڈ بیسڈ پلیٹ فارم نامی اس سہولت میں ڈجیٹل حقوق انتظامیہ تحفظ مواد ہوگا۔ ارکان اپنا رکنیت نمبر درج کر کے سہولت سے استفادہ کرسکتے ہیں۔ لیکن اس مواد میں وہ کسی قسم کی تبدیلی نہیں کرسکتے۔ ہوسمنی نے کہا ’’ سی ای ٹی اور نیٹ سے لے کر سیول سرویس تک کے مقابلہ جاتی امتحانات کے لئے موجود اسٹڈی میٹرئیل سے طلبہ کو اپنے مستقبل کے لئے تیاری کرنے میں مدد ملے گی‘‘ ای بکس کے علاوہ لائبریری میں ای میگزینس اور جرنلٹس بھی دستیاب ہوں گے۔ جو مفت بھی ہوں گے اور انہیں خریدا بھی جاسکے گا۔ میسیو اوپن آن لائن کورسز( موک) مظاہرہ اور ٹسٹ سے بھی طلبہ کو کافی مدد ملے گا۔ اس کے علاوہ عام لوگوں کے لئے غیر تعلیمی کتابیں بھی ہوں گی۔ جو ہر عمر کے افراد کے فائدہ کے لئے رہیں گی۔ اس کے لئے ادیب و قلمکار بھی اپنی ای کتابیں عطیہ میں دے سکیں گے۔ اس کے ویب سائیٹ/ ایپ پر با قاعدہ کتابوں سے متعلق تمام معلومات دستیاب ہوں گی جو متعلقہ لائبریری میں ہیں۔ ان تمام کے لئے دور دور سے رسائی رہے گی اور لوگ فائدہ اٹھا سکیں گے۔