بنگلورو،9؍جنوری (ایس او نیوز؍یواین آئی) کرناٹک کے وزیر صحت ڈاکٹرکے سدھاکر نے بتایاہے کہ ریاست کو ہفتہ تک کورونا وائرس سے بچاؤ کے ویکسین کی13لاکھ 90 ہزارخوراکیں مل جائیں گی اور یہ پیر تک تمام اضلاع میں دستیاب ہوجائے گی-

ڈاکٹر سدھاکر نے جمعہ کو یہاں کورونا ویکسین کی دستیابی کے پہلے مرحلے میں ویکسین کی تقسیم کے لئے کرناٹک کے نام پر غور کرنے پر مرکزی حکومت کا شکریہ ادا کیا- انہوں نے بتایا کہ وہ ویکسی نیشن ریہرسل کے دوسرے مرحلے اور پرائمری ہیلتھ سینٹر (پی ایچ سی)، ہیلتھ مراکز، نجی اسپتالوں وغیرہ کی تیاریوں کی نگرانی کے لئے چک بلاپور میں تھے -

انہوں نے دعوی کیا کہ ریاست ہر ایک کے لئے ویکسین حاصل کرنے اور اسے موثر انداز میں تقسیم کرنے کے لئے پوری طرح تیار ہے - انہوں نے کہا کہ کورونا ویکسین کی13لاکھ 90ہزار خوراکیں تقسیم کی جانے کی امید ہے اور اسے تمام اضلاع میں تقسیم کیا جائے گا-

ڈاکٹر سدھاکر نے بتایا کہ پہلے ہیلتھ ورکروں کو رجسٹر کیا جائے گا- انہوں نے بتایاکہ ہم نے ریاست میں 630لاکھ ہیلتھ کارکنوں کو رجسٹرڈ کیا ہے - ان میں سے کچھ جن کے نام رجسٹرڈ نہیں ہوئے ہیں وہ میڈیکل اور ڈینٹل کالجوں سے ہیں، ہم نے سبھی سے اپنے نام درج کرنے کی درخواست کی ہے - ہیلتھ ورکروں کے بعد کورونا کی علامات والے افراد، 60سال سے زیادہ عمر کے افراد اور پولیس اور محکمہ محصول کے عملے جو ڈیوٹی کررہے ہیں انہیں ٹیکہ لگایا جائے گا-

ریاست میں کورونا ویکسی نیشن ریہرسل کا دوسرا مرحلہ24ڈسٹرکٹ اسپتال،20میڈیکل کالجوں،43تعلقہ اسپتال،31کمیونٹی ہیلتھ سنٹر، 87پرائمری ہیلتھ سینٹر،30شہری پرائمری ہیلتھ سنٹر اور28نجی اسپتالوں سمیت 263پی ایچ سی میں مکمل ہوا-مرکزی حکومت کے رہنما خطوط کے مطابق کورونا ویکسی نیشن ریہرسل کا پہلا مرحلہ 2دسمبر کو بنگلور، بلگاوی، کلبرگی، میسور اور شیموگہ میں مکمل ہوا تھا-